Салғырттық сан соқтырмасын десек...

Соңғы үш жылдық еліміз басынан ауыр кезеңді өткерді. Ауыр дейтініміз бүкіл әлемді шарпыған коронавирус дерті біздің елімізді де дендеп кетті. Қаншама жақындарымыз дерттің құрбаны болды. Бірде өршіп, бірде бәсеңдеген ауру дер кезінде қабылданған шаралардың арқасында қауқарын жойды. Дегенмен түбегейлі тамырымен жойылмады. Біз қатаң режимсіз, жайбарақат өмірге оралғанымызбен, әлі де қауіп сейілген жоқ.

Соңғы уақытта аурудың қайта белең ала бастағаны туралы ақпаратты жиі естіп жүрміз. Бұл жаңалық бәрімізді алаңдатып отырғаны жасырын емес. Өйткені коронавирустың салдары қандай болатындығына бәріміздің көзіміз жетті. Сондықтан ауру атын естігенде жүрегіміз селт ете қалатыны жасырын емес. Ақпаратты жалған деуге де болмас. Өткен тәуліктің өзінде біздің аймақта елуден астам адам аталған ауруға шалдыққаны анықталып отыр.

Демек бұл бізді сақтық шараларын сақтауға шақырып отыр. Аз ғана уақытта қатаң режиммен жүретін болсақ, аурудың асқынбауына себепкер боламыз. Сондықтан нақты емін әлем таба алмаған дерттің тырнағына ілікпеудің жолын қамдағанымыз абзал.

Б. ҚАРЫМСАҚОВА, 
қала тұрғыны