Қауіпті індет күннен-күнге өршіп барады

Біз әлі де күресіп келеміз. Бір жылдан астам уақыт болса да, коронавирусты ауыздықтай алмай отырмыз. Біресе бәсеңдеп, біресе өршіп отырған дерт соңғы кезде тіпті құрығын көпке салды. Сонда да адамдар саналы түрде бұрыс қадамдар жасауда. Санитарлық талаптарды сақтамай той тойлаудан арыла алмай отырмыз. Күні кеше ғана біріміз туыстан, біріміз жақынымыздан, енді біріміз әріптестен қапыда көз жазып қалдық. Дегенмен мұндай жағдайлар бізге сабақ болмаған сыңайлы. Осының салдарынан көрсеткіш күн санап көтеріліп барады. Дерттің түбегейлі жойылып кетпегендігі ескеріліп, белгілі шектеулер мен санитарлық талаптарды сақтау міндеттелген еді. Бірақ халық мұның бәрін ұмыт қалдырғандай. Көшеде бетперде тақпай жүргендер саны артты. Халық өздерін «ауру жоқ» деген желеу сөзге алдандырды. Дегенмен бүгінгі ахуал көңіл көншітпейді. Республика аумағында ғана емес, Аралдың өзінде ауруға шалдыққандардың саны күн санап артып келеді. Бұл жағдай талаптарды сақтау маңызды екендігін аңғартқандай.
Жайбарақат күн кешуге әсте болмас. Себебі коронавирус инфекциясы – тез тарайтын аса қауіпті ауру. Бүкіл әлемді дүрліктірген дүлей дерттің әлі де нақты емі табылмай жатыр. Әрбіріміздің салғырттық танытқандығымыздың салдары науқастар санының артуына себеп болып отыр. Біз сияқты шағын мемлекет үшін соңы өлімге душар ететін мұндай арулар аса қауіпті. Сондықтан бұл ауруға немқұрайлы қарамау керек екендігін уақыт көрсетсе де, біз әлі де мойынсұнбай келеміз.
«Сақтансаң сақтаймын» деген халқымызда жақсы сөз бар. Аталған дерттің ауқымы кең. Ол бүкіл әлемге ауыз салды. Қаншама адам осы дерттен көз жұмды. Сондықтан өзіміз үшін, болашақ ұрпақ үшін аз уақыт сабырлық сақтап, санитарлық талаптарды сақтайтын болсақ, бұл қиындықты да еңсеретін боламыз. Әрбіріміздің бір ғана әрекетіміз аурудың санының артуына немесе азаюына септігін тигізбек. Сол себепті көшеде бетперде тағып, қолды жиі жуып, қарапайым талаптарды сақтап өмір сүруге шақырамын.
М. СӘРСЕНБАЕВА,
Сексеуіл кентінің тұрғыны