Туымыз енді төмен түспесін

Адамзат басына тағы бір зұлмат заманды өткеруде. Көрінбейтін жаумен күресіп, емі жоқ індеттің құрығына ілінген жандардың саны күн санап артуда. Биылғы жыл еліміз үшін ғана емес, әлем халықтары үшін де өте ауыр болды. Қытай елінен бастау алған кесел бүкіл әлемді жайлады. Дендеген дерт біздің елімізге де құрық салды. Наурыз айынан бастап коронавирусқа шалдыққан алғашқы науқастар тіркеле бастады. Осылайша күн санап ауру жұқтырғандардың қатары көбейе түсті. Бүгінде жұқтырып қана қоймай, ажалына аталған кесел себепші болғандар да жетерлік. Осыған орай ел Президенті Қасым-Жомарт Тоқаев 13 шілде жалпыұлттық аза тұту күні деп жариялады.

Адамзат тарихында соғыс, ашаршылық, жұт сынды замананың ауыртпашылығын өткерді. Ал бүгінгідей технология дамып, дербес мемлекет болып еңсе тіктеген шақта белгісіз дерттің отты жалыны әлемді шарпыды. Қазіргідей ақпарат ағымы толассыз күшке айналған шақта елі ішіндегі ғана емес, әлемдегі жаңалықтарды да жылдам біліп отыратын күнге жеттік. Аталған аурудан әлем халықтары көз жұмып жатыр. Өкініштісі, сол коронавирус бізді де айналып өтпеді. Бүгінде ажал құшқандардың саны біршама артты. Бұл – біз сияқты өскелең мемлекет үшін өте алаңдайтын мәселе. Тіпті кеше ғана дәм-тұздас болған жақынымыз бен таныс ауылдасымыздың, көрші, құда, құрбы-құрдасымыздың осы дертке шалдығып, кейіннен бақилық болғанын естіп, қабырғамыз қайысты.

Бүгінгі жалпұлттық аза тұту күніне орай коронавирус салдарынан жақынынан айырылған жандардың қайғысына ортақтасып, көңіл айтқым келеді. Жақын арада дерттің емі табылып, халқымыз ауыртпашылықтан құтылып, жайдары күнге оралса деген тілегім бар.

Кішкене Айбосынов,

аудандық ардагерлер кеңесінің төрағасы