Елімізде бүгінгі ахуалға назар аударсақ, коронавирус індетіне шалдыққандар саны сағат санап артып жатыр. Қазірдің өзінде елімізде аталған дерттің тырнағына 16 мыңнан астам адам ілікті. Науқастардың көбеюіне өзіміздің салғырттығымыз себеп. Төтенше жағдай режимі тоқтап, қатаң талаптар біртіндеп жеңілдетіле бастаған шақта дерттен түбегейлі құтылғандай жайдары тұрмысқа көшуге асықтық. Жеке бастың талаптарын сақтауды қойып, той тойлауды бастап кеттік. Тойхана жабылып, мейрамханаға шектеулер енгізсе де, үй ауласында ұлан-асыр той жасап жатқандар жетерлік. Лайым, елімізде той көп болсын. Бірақ қазіргідей еліміз ауыр кезеңді өткеріп жатқан шақта дүркіретіп той жасау әбестік болар.
Бүгін біз қысылтаяң шақта тұрмыз. Індет күннен-күнге дендеп барады. Тіпті жақын танысымыз, туысымыздың, көршіміз бен әріптесіміздің коронавирус жұқтырғаны анықталғаны жөнінде естіп жатырмыз. Біздің ауданның өзінде аталған ауруға шалдыққан науқастар көбейіп жатыр. Осыны ести тұра, біз «Бір құдай жар болсын» деген тәмсіл сөзді ұран етіп, той тойлауды тоқтатып жатқан жоқпыз.
Біз тарихта талай нәубетті жылдарды бастан өткердік. Тәуелсіздік алған 30 жылға жуық уақытта санымыз жағынан 18 миллионға жуықтадық. Енді ұлт басынан тағы да бір сын сағатын өткеруде. Бұл аурумен бірігіп күреспесек, өзімізді ғана емес, жанымыздағы жақынымызға зардап шектіруіміз мүмкін. Сондықтан даңғаза тойды доғарған жөн. Аз уақыт шыдамдылық танытсақ, жақсылығы мол жаймашуақ өмірге де тез оралатын боламыз.