Сайлау - 2022: Ел болашағы біздің қолымызда

Егеменді ел атанғалы мемлекетіміз біршама деңгейде дамығаны белгілі. Сонымен бірге халық жағыдайы да бұрынғыдан бірнеше есе жақсарып қалды. Иә, еліміз сан ғасырлық қиын-қыстау кезеңдерден де өткен болатын. Мемлекеттік рәміздеріміз, Ата заңымыз, ұлттық валютамыз және Сарыарқаның кең жазық даласында барша елдің өзінің тез көркейіп өсуімен таң қалдырып, жаңа Астанамыз дүниеге келген болатын. Бүгінге дейін мемлекетіміз тек биік деңгейлерден көркейгені рас.

Ендігі кезекте барша қазақ халқы алда келе жатқан кезектен тыс Президент сайлауын асыға күтуде. Еліміздің әрі қарай да дамуы жолында бейбіт аспан астында өз таңдауларын жасамақ. Алдағы сайлау барысында Президенттікке кандидатқа түсетін азаматтарға да талаптар қойылды.

Атап өтер болсақ, кандидат тумасынан ҚР азаматы болуы тиіс, 40 жасқа толған, мемлекеттік тілді терең меңгерген, соңғы 15 жыл бойы Қазақстанда тұратын, жоғары білімді, сонымен бірге мемлекеттік қызметте кемінде 5 жыл жұмыс тәжірибесі бар және белсенді сайлау құқығына ие азамат болуы тиіс. Аталған талаптар дұрыс және орынды екені көрініп тұр. Себебі ел болашағы үшін кез келген адам Президент бола алмасы анық. Ал мемлекет келешегін жақсарту халықтың да қолында.

Алда келе жатқан сайлауға барлығымыз белсенді түрде атсалысып, мемлекетіміздің өркендеуіне үлес қосқанымыз жөн. Әр азаматтың дауысы маңызды. Сол үшін сіз де Қазақстан Республикасының азаматы ретінде өз таңдауыңызды жасауға лайықсыз.

А. Сәкенқызы