Инклюзивті білім беру саласының мамандары ауқымды мәселелерді талқылады
Бүгін инклюзивті білім беру саласының мамандары кездесіп, «Мүмкіндігі шектеулі балалар үшін инклюзивтік ортаны қалыптастыру бойынша 2020-2022 жылдарға арналған өңірлік Жол картасы» аясында атқарылған жұмыстарды талқылады. Осы бағытта ауданда инклюзивті қолдау кабинеттерін ашу, оны арнайы мамандармен қамту және біліктілігін арттыру курстарынан өткізу, оқу-әдістемелік құралдармен жабдықтау әрі инклюзивті білім алу үшін кедергісіз ортаны қалыптастыру жолға қойылды. Қазіргі таңда ауданымызда психологиялық-педагогикалық түзету кабинеті, мектептер базасынан инклюзивті ресурстық орталық және инклюзивті қолдау қабинеттері жұмыс жасап, онда психолог, логопед, дефектолог, сурдопедагог мамандар сапалы қызмет көрсетуде. Сондай-ақ бірқатар мектептерде инклюзивті сыныптар ашылып, мүмкіндігі шектеулі балалардың білім алуына мүмкіндік жасалып отыр. Оларға кедергісіз орта қалыптастыру мақсатында пандустар да салынуда.
Сонымен қатар ауданда жуырда ғана ерекше балаларға арналған «Өнерім саған, Қазақстан!» атты облыстық фестиваль болып өтті. Мұнда мүмкіндігі шектеулі балалар өз өнерлерін көрсетіп, оларға түрлі сыйлықтар табысталды.
Кездесу соңында инклюзивті білім беру мамандары мүмкіндігі шектеулі балаларға қолайлы орта қалыптастырып, сапалы білім беру үшін ауданымызда атқарылып жатқан істердің ауқымын кең деп бағалады.
"Толқын ақпарат"
