Барлық мемлекеттік қызметшіден өз жұмысын адал атқаруды талап етемін - Тоқаев

Бүгінгі ұлықтау рәсімінде мемлекет басшысы Қасым-Жомарт Тоқаев қолынан іс келетін және елге беріле қызмет жасайтын азаматтарға ғана ортамызда орын бар екендігін айтып өтті.«Басқа маңызды әрі өзекті мәселелер бойынша шешімдерді кейінірек жариялаймын. Тағы да қайталап айтамын, алда атқаратын шаруа көп. Бұл – жеңіл жұмыс емес, бірақ елге пайдасы тиетін қызмет. Мен бүкіл мемлекеттік аппараттан осы міндетті абыроймен орындауды талап етемін. Қолынан іс келетін және елге беріле қызмет жасайтын азаматтарға ғана ортамызда орын бар», - деді Президент.Сонымен бірге мемлекет басшысы өз ісіне адал адамдарға қолдау көрсетілетінін, қоғам оларға құрмет білдіретінін айтты.
«Халқымыздың нақыл сөзін сәл түрлендіріп айтсақ: «Байлық пен мансап – қолға ұстаған мұз, ериді де кетеді. Ал, елге жасаған қызмет – артта қалған із, ол ұрпақтан ұрпаққа жетеді». Осыны әр азамат түсінуі керек. Ел мүддесі – бәрінен биік. Мен барлық мемлекеттік қызметшіден өз жұмысын адал атқаруды талап етемін», - деді Қасым-Жомарт Тоқаев.