Тұмаудың алдын алу шаралары
2022 жылдың 11 айының қорытындысы бойынша Арал ауданының тұрғындары арасында жедел респираторлық вирусты жұқпалардың 1000 жағдайы тіркеліп, оның 601-і 14 жасқа дейінгі балалар болса, 59 жағдайы жасөспірімдер арасында тіркелген. 2021 жылдың осы мерзімінде жедел респираторлы вирусты жұқпасымен 1191 науқас тіркеліп, оның 703 жағдайы 14 жасқа дейінгі балаларды құраса, 66 жағдайы жасөспірімдер арасында болған. Аурушаңдықтың жалпы көрсеткіші өткен жылдың осы мерзімімен салыстырғанда 191 жағдайға, балалар арасында 102 жағдайға азайғанмен, алдағы эпидемиологиялық маусым кезеңінде аурудың тіркелу деңгейі көтеріліп, ауданда эпидемиологиялық ахуал «қолайсыз» болуы мүмкін. Үстіміздегі жылдың осы мерзімінде тұмау жұқпасының лабораториялық жолмен нақтыланған 4 жағдайы тіркелді,барлығы да 14 жасқа дейінгі балалар. 2021 жылдың 11 айында жұқпа тіркелген жоқ. Әр жылдың күз-қыс айларында адамдар арасында тұмау және сол тектес аурулармен науқастанушы адамдар саны көбейе түсетіні белгілі. Тұмау негізінен адамдар арасында ауа-тамшылары арқылы жұғатын ,тез тарайтын жедел жұқпалы аурулар қатарына жатады. Тұмау жұқпасы ауру адамнан дені сау адамға түшкіргенде және жөтелгенде, сөйлегенде, сондай-ақ науқас адамның жеке қолдану заттарын ортақ пайдаланғанда (ыдысы, сүлгісі, қол орамалы және т.б.) жұғады.Тұмаудың белгілері: дене қызуы 38-390С-қа дейін көтеріледі, кей жағдайда одан да жоғары көтерілуі мүмкін. Денеде әлсіздік болып,бас және бұлшық еттер ауырады, көзі жасаурап, қызарады,мұрын бітіп, тамағы қарлығады.
Тұмау ауруының қауіптілігі сонда, тұмаудан кейін қайталап ауырып, әртүрлі күрделі асқынуларға жалғасып, оның жедел және созылмалы түріне өтуі мүмкін. Бірінші кезекте жүрек-қан тамырлары мен тыныс алу жолдары ағзаларының ауруларын туғызады, қызметін қиындатады. Бұл көп ретте науқастардың төсек тартып жатып қалуына, еңбектен қол үзуіне әкеліп соқтырады.
Тұмау ауруының алдын алу шараларының тиімді және сенімді жолы-осы жұқпаға қарсы халықты жыл сайын вакцинациялау болып табылады.
Вакцина ересектерді де, балаларды да тұмаудан қорғап қана қоймай, оның асқынуларынан және өлімнен де қорғай алады. Бұдан басқа тұмау және сол тектес аурулардың алдын алу шараларына сонымен қатар бөлмені желдету, дәрумендерге толы, әсіресе, құрамында «С» дәрумені бар тағамдарды пайдалану, маскаларды қолдану, қолды сабындап жиі жуу, ансептиктермен залалсыздандыру , тұмауға қарсы дәрі-дәрмектерді қабылдау, адамдар көп жиналатын жерлерде қашықтықты сақтау, дене қимылымен, спортпен айналысу, таза ауада жиі жүру секілді қарапайым қағидалар да жатады.
Арал аудандық санитариялық-эпидемиологиялық бақылау басқармасы
Фото:kptd.ru
