Тұмау жұқпасының алдын алу шаралары

 Тұмау жұқпасы- ауа-тамшы жолымен берілетін, жоғары тыныс жолының зақымдануымен көрініс беретін,тыныс жолдарының жедел жұқпалы ауруы. Жыл мезгілінің күз және қыс айларында тыныс жолдарының жіті вирусты жұқпалары мен  тұмау ауруының тіркелу деңгейі көтеріліп,   осы аурумен науқастанғандар саны өсе түседі. Ауруға шалдығу балалар мен жасөспірімдер арасында жоғары, оның ішінде әсіресе, ұйымдасқан балалар арасында жиі тіркеледі. Статистикалық мәлімет көрсеткендей, тыныс жолдарының жіті вирусты жұқпаларымен жалпы науқастанушылардың 50-60 пайызы балалар мен жасөспірімдер үлесінде.  Арал ауданы бойынша 2022 жылдың  10 айында аудан тұрғындары арасында тыныс жолдарының жіті вирусты жұқпасымен  916 жағдай тіркеліп, оның 566-ы 14 жасқа дейінгі балалар, ал 51 жағдайы  жасөспірімдер арасында орын алған. 2021 жылдың осы мерзімінде тыныс жолдарының жіті вирусты жұқпасымен 176 науқас тіркеліп, оның 122  жағдайы 14 жасқа дейінгі балалар үлесінде болған. 2022 жылы тұмау жұқпасының 2 жағдайы тіркелді, екеуі де 14 жасқа дейінгі балалар, оның ішінде 2 жасқа дейінгі науқас бала саны-1. 2021 жылдың 10 айында  тұмау жұқпасы тіркелмеген.       Тұмаудың таратушы көзі-осы аурумен науқастанушы адам.  Аурудың жасырын кезеңі 1-2 сағаттан 1-2 күнге созылады. Инфекция көзінің  ең залалды уақыты-аурудың алғашқы күндері. Ауру адам вирусты қоршаған ортаға тыныс жолдары арқылы (түшкіру,жөтелу кезінде) бөледі. Ауру адамнан бөлінген  ауру қоздырғышы 1-3,5 метр қашықтыққа дейін  таралады.
     Тұмаудың клиникалық белгілері: ауру жедел басталады,жеңіл,орташа немесе ауыр клиникалық формада өтеді. Науқастың дене қызуы 38-39⁰С-қа дейін көтеріліп, бас ауру, жөтел, бұлшық еттердің ауруы, әлсіздік  пайда болады.
Балалар үшін қауіптілігі - дер кезінде емделмесе, пневмонияға, менингитке, отит, менингоэнцефалитке, гайморит сияқты ауруларға ұласып , асқынып кетуі мүмкін.  
Тұмау ауруының алдын алу шараларының  ең тиімді әдісі індет басталмастан бұрын тұмауға қарсы егілу (қыркүйек -қазан айлары). Егілу  40-70 % дейін ауруға шалдығуды азайтады.  Вакцина алғандардың арасында аурудың ауыр түрі, асқынуы сирек кездеседі.
Індет кезіндегі профилактикалық шаралар:
- Құрамында С дәрумені бар өнімдерді көбірек пайдаланыңыз. Сұйықтықты, әсiресе лимон, бал, таңқурай, итмұрын қайнатпалары  қосылған  шәйдi, минералды суды көбiрек iшу қажет.
-Көпшілік жерге барғанда, науқастармен байланыста болған кездері медициналық бетперде тағу.
-Үй-жайларды, балалардың ұйымдасқан ұжымдарында  топ, оқу бөлмелерін жиі желдетіп, ылғалды  жуып-шаю жұмыстарын жүргізу.  
- Тұмау ауруының  алдын алуда ағзаны жүйелі шынықтырудың үлкен маңызы бар. Таза ауада көп жүру, дене шынықтыру және спортпен айналысу   аурулардың алдын алуға үлкен септігін тигізеді.
   Арал аудандық санитариялық-эпидемиологиялық бақылау басқармасы