Елінің Әбілтай атты ардақтысы еді

Өмір керуеніне ілесіп, өмір өзені  ағысымен өлшеніп берген өмірін қай пенде де өткізеді. Кейбіреулердің өмірден өтісімен көп ұзамай өзі де, аты да, ұмытыла бастайды. Ал еңбек ете жүріп, туған жерінің рухани өсіп, дамуына ұлтының ұйысуына үлес қосып дүниеден озған жандардың есімі мәңгіге ұлықталып, есте сақталады. Артында ізгілікке толы сайраған іздері, халқының сүйіп берген Азамат атағы қалады. Атаның қанымен, ананың сүтімен адами, асыл қасиеттерді бойына мол дарыта білген, тектілік пен берік ұстамдылық арқылы өз өмірін өзі сомдаған, қиын да қызықты өмір жолдарынан өткен абзал азаматтарды еске алғанда олардың ұмытылмайтындықтарына анық көзің жетеді. Ағаның ақ жарқын мінезді, адам баласына қамқорлықтан басқа титтей де болса жаманшылық ойламайтын жомарт жүректі, әзиз жан екенін бәріміз білеміз.Өткенсіз бүгін жоқ. Ағамыз Арал ауданы, Құланды ауыл советіне қарасты Авань  елді мекенінде дүниеге келген.  Тақуалықты өмірінің бұлжымас қағидасына айналдырып, жаны ізгілік пен имандылықтың нұрын шашып тұрған ата-анасының өнегелі  тәрбиесімен сусындап өсті. 10  жылдық мектепті жақсыға бітіріп, Арал қаласындағы ФЗУ – ге оқуға түскен. Оны үздік тәмамдаған соң,  еңбек жолын Авань балық заводынан бастаған.  «Бойки» репережатор т.б. кемелерде моторист, механик, кейін инженер болып қызмет атқарды. Арал теңізі тартылып, айдынды жағалауды мекендеп, ата кәсібі балықшылықтан нәсібін айырып отырған қалың ел жан-жаққа көше бастағанда, ол да Арал қаласына қоныс аударып, сондағы балық комбинатында  жұмыс жасады. Балық шаруашылығындағы тұрақты 54 жылық еңбек өтілінде цех бастығы, өндіріс бастығы, директордың орынбасары, директор болып қызмет атқарды. Орыстың атақты жазушысы М.Горькийдің «Адам еңбекте, тек қана еңбекте ұлы» деп тебіренгеніндей, Әбекең ел игілігі үшін көп жылғы қажырлы да табанды еңбегінің жемісі ретінде 2005 жылы Елбасының «Аграрлы Қазақстан» кітабына суретімен енді.  «Заслуженный работник» атағын алды.   
Қазақта «Адам болатын бала алысқа қарайды» деген аталы сөз бар. Өткен ата-баба жолын зерделеп, өзінен кейінгі ұрпаққа олардың тарихтағы орнын  дәріптеуді мақсат еткенінің өзі - ерекше атап айтуға тұрарлық дүние. Қазақтың жер қорғау, ел азаттығын сақтау жолындағы сыртқы жаулармен өткізген талай қан майданында аты ұранға айналып, жауынгерлер жанына жігер берген көреген қолбасшы, әулие Құл батыр Қартайұлының өмір жолын жас буынға танытуда көп еңбек сіңірді. Бабаның басына алты құлақты кесене тұрғызып, алыс-жақындағы ағайынның басын қосып, ас беруді ұйымдастыруды өз мойнына алған азамат.  Арал қаласының қақ ортасындағы «Тәуелсіздік» алаңы- осы аймақтан шыққан атақты би, батыр, ақын-жыраулардың ұлағатты есімдері мәрмәр тасқа қашалып жазылған, ұрпақтар қастерлеген киелі де қасиетті орын. Сол кездегі аудан әкімі Нәжмадин Мұсабаевқа кіріп, Құл батыр бабаның ел мен жердің тұтастығы жолындағы теңдессіз ерлік істерін тарихи деректермен дәлелдеп, мәрмәр тақтаға мәңгілікке атын жаздырту туралы пікірін айтқан.  Құл батыр баба тақтаға аты жазылатын  батырлардың ең үлкені әрі Шектінің алғашқы ұраны болғандықтан, оның есімі тақтаға бірінші болып жазылды.
Ағамыз 2009 жылдан бастап бабаның басына кесене салу, ас беруді ұйымдастыруды қолға алып, жалғыз өзі көпке бергісіз істер атқарды.  Шалқарға келіп, комиссия құрып, счет ашып, бар мәселені көпшілікпен ақылдасып шешті. Ұтымды ұйымдастырылған жұмыс қай уақытта да нәтижелі ғой. Батыр бабаға берілген ас өте жоғары деңгейде өтті. Елдің ықыласы да ерекше білініп тұрды. Сол күні табиғат та бар мейірімін төгіп, ауа-райы асқа жиылған жұртшылыққа да, бәйгеге түскен сәйгүліктерге де аса қолайлы болды. Түрлі пікірдегі азаматтардың ынтасын мұндай өрелі істерге жұмылдыруға  кез келген адамның жетесі жете бермейді. Бұл да болса ағамыздың ерекше қасиеттерінің бірі еді. Ағамыз зейнеткерлікке шыққанда да қарап отырмай, аудан көлеміндегі түйткілді мәселелерді шешуде өмірлік тәжірибелерімен бөлісіп отырды. Аудан басшыларымен тіл табысып, қажетті уақыттарда ұсыныстарын айтып, еліміздің сындарлы  саясатының жергілікті жерде жүзеге асуына тілектестігін білдіріп жүрді.
Әбілтай ағамыз, жеңгеміз Күлән екеуі үлгілі отбасылық өмір сүрді. Ұл-қыздарына жақсы тәлім-тәрбие берді, қатарларынан қалдырмай оқытты. Үлкен өмірге жолдама берді. Күлән жеңгеміз өмірден ерте өткенімен, ағамыз оның орнын жоқтатпай, алтын асықтай 7 баланы  әкелік мейіріммен аялап өсірді. Немере, шөберелерінің қызығына кенелді. Ол ешкімді барлығына, байлығына, мансабына, қарап бөлмей, алаламай, әр адамды қадірлеп, жақсы қарым-қатынаста болды. Ағайынның ауызбіршілігін, татулығын сақтауды ең биік азаматтық борышым деп санады. Өмір бойы елін, туысын, достарын, ойлап өтті, елінің құрметті азаматы атанды. Қазір бұлар әрқайсысы бір рулы ел болып отыр. Өмірінің жалғасы- ұл-қыздары Тәуелсіз Қазақстан атты Республиканың жарқын болашағы жолында мамандықтары бойынша жемісті еңбек етіп келеді. Өмір осылай жалғаса береді. Елдің Әбілтай атты ардақты азаматының есімі халқының жадында мәңгі сақталады.

Бағжан Жоламанов Жиенбайұлы (нағашысы)
Шалқар қаласы
Зейнеткер ұстаз. Халық ағарту қызметінің үздігі, ардагер, спортшы.
18 шілде 2019 жыл.