Қызылордада «Сыр дарыны» академиясының оқу-жаттығу жиындары өтуде

Сыр өңірінде «Балалар жылы» қарсаңында білім саласында бірқатар іс-шаралар мен тың жобалар іске асырылуда. Солардың ішінде дарынды балаларды қолдау мақсатында «Сыр дарыны» жобасы тиімді жұмыс жасауда.

«Сыр дарыны» білімділер академиясының жаңа маусымы 2022 жылы қазан айынан бастау алды. Онда «Дарын» қосымша білім беру орталығының ұйымдастыруымен өткізілген іріктеу олимпиадасында үздік нәтиже көрсеткен 7-10 сынып оқушылары арасында 960 оқушы жыл бойы үзбей дайындық сабақтарына қатысатын болады.

Оқу-жаттығу жиындары Арал ауданындағы «Қамбаш» және Жаңақорған ауданындағы «Талдысу» олимпиадалар және қосымша білім беру орталықтарының базасында өткізілуде. Бүгінде орталықтарда кестеге сәйкес жолдаманы жеңіп алған 7-сыныптың 240 оқушысы олимпиадаға дайындалуда. Мұнан соң 25 сәуірден бастап 9 сыныптар арасында іріктеуден өткен үздік 240 оқушы білім бәсекелеріне дайындықтарын шыңдайтын болады.

10 күнге созылатын оқытуда оқушылар қалаған таңдау пәндері бойынша шебер, педагог-зерттеуші санатындағы мұғалімдерден білім алуда. Оқытушылар қазіргі заманауи үлгідегі құрал-жабдықтар мен интерактивті тақтамен қамтамасыз етілген кабинеттерде тереңдетілген білім беру стандартымен сабақ жүргізуде.

«Талдысу» және «Қамбаш» олимпиадалар және қосымша білім беру орталықтарында сабақтан тыс оқушылар үшін күнделікті қызықты іс-шаралар да ұйымдастырылады. Лагерь әдіскерлері психологиялық тренингтер, танымдық ойындар мен спорттық шаралар өткізіп, оқушылардың бос уақыттарын көңілді өткізуде.

Айта кетейік, білімділер академиясының оқу-жаттығу жиындары 12 аусыммен 6 ай бойы жалғасатын болады.

Қызылорда облысының білім басқармасының баспасөз қызметі

syrboyi.kz