Толқын Tolqyn.kz ақпараттық агенттігі
» » Өзгерістер орын алмақ

Өзгерістер орын алмақ

Бүгінде ел экономикасының дамытушы күштерінің бірі кәсіпкерлік саласы екендігі белгілі. Осы тұста мемлекет тарапынан да біршама жұмыстар атқарылып, кәсіп ашамын деген жандарға көптеген мүмкіндіктер қарастырылған. Иә, бұл жұмыссыздық мәселесін жою жолында да өте тиімді әрекет болып табылады. Мемлекет басшысы Қазақстан халқына Жолдауында да кәсіпкерлік саласы бойынша көптеген мәселелерді көтеріп, жақсы жаңалықтарымен бөліскен болатын.
–Тағы бір маңызды мәселе – кәсіпкерліктің бүгінгі ахуалы. Билік пен бизнестің арасында сындарлы диалог болуы қажет. Қазіргі өтпелі кезеңде мемлекеттік органдардың кемшілікке жол беретіні, кейде асыра сілтейтіні жасырын емес. Сондықтан экономикалық сипаттағы кейбір заң бұзу әрекеттерін қылмыс санатынан алып тастау жұмысын жалғастыру қажет. Бұл жерде сөз кәсіпкерлерге және олардың экономикалық теріс әрекетке қатысты істер туралы болып отыр. Салық саласында заң бұзғандарды қылмыстық жауапкершілікке тартуға негіз болатын шекті анықтайтын әділ механизм енгізу қажет, – деді Президент.
Сонымен бірге мемлекет басшысы Қасым-Жомарт Тоқаев еліміздегі болып жатқан кейбір әділетсіздікті жою мақсатында кәсіпкерлікті қолдау жөнінде де айтып өтті. Бизнестегі бәсекелестікті дамыту мәселелерін де қозғаған болатын.
– Құқық қорғау органдарының кәсіпкерлерді қудалауын біржола тоқтату керек. Мұндай әрекеттерге тыйым салынған. Бірақ, соған қарамастан, әлі де жалғасып жатқанын білемін. Осындай мәліметтер кейде әдейі таратылып жатады, тіпті, олар жалған болуы да мүмкін. Қалай десек те, бұл – назардан тыс қалдыруға болмайтын мәселе. Кәсіпкерлікке қолдау көрсету, саланы реттейміз деген желеумен жасалатын қысымды азайту және бәсекелестікті дамыту мәселелерін мұқият талқылау қажет. Сондықтан мен жуық арада еліміздің бизнес өкілдерімен арнайы кездесу өткіземін, – деді мемлекет басшысы.
Кәсіпкерлік саласы қай уақытта да қоғамнан өз орнын жоғалтпайды. Сол үшін мемлекет тарапынан кәсіпкерлерді қолдауға арналған түрлі бағдарламалардың арқасында бүгінде өз кәсібін ашып, несібесін көріп отырған жандар жетерлік. Иә, қайтарымсыз грант ұтып алып, отбасын асырап отырғандар да бар. Сол үшін еліміздегі кәсіпкерлік саласын дамыту бойынша Президент Жолдауын қолдай отырып, барлығымыз әділетсіздіктің алдын алуымыз қажет. Міне, осы кезде дамыған мемлекеттер қатарынан көрініп, «Жаңа Қазақстанның» дамуына септігіміз тиері анық.
Әдемі ҚУАНДЫҚОВА,
кәсіпкер
06 қыркүйек 2023 ж. 243 0