Алып бала туған ана
Бала – өмірдің сәні. «Балалы үй – базар, баласыз үй – қу мазар» дегендей, бала күлкісі естілген үйдің берекесі мен байлығы молынан болмақ. Сол дүние есігін ашқан сәбидің салмағы 4-5 келіден асса «ірі бала» болады екен, ал 6 келіден аса туған бала дүниеге келгенде «алып бала дүниеге келді» деп дүйім жұрт болып қуанышқа кенелді. Біздің бүгінгі сөз еткелі отырған кейіпкеріміз 9 перзентінің қызығына бөленіп, қуанышына тоймай жүрген алып баланың анасы Мижанова Гүлдария болмақ.Өткен жылдың 11 маусым күні таңғы мезгілде толғақ қысып, Гүлдарияны перзентханаға жеткізді. Арал қалалық орталық перзентханасында баласын дүниеге әкелген ананың бұл сәбиі 9-шы перзенті еді. Баланың дүниеге келгенде салмағы – 6 кг 550 грамм, бойы – 57 см.
Бұл туралы алтын құрсақты ана Гүлдария:
– Алланың қалауымен балам аман-сау жарық дүние есігін ашты. Білікті маман, гинеколог Бекбосынов Руслан Толыбекұлы және еңбек өтілі жоғары акушер Қалауова Мира апайдың арқасында қол-аяғымды бауырыма алдым. Балам ешқандай кінәратсіз, аман-есен дүниеге келді. Үш күн дәрігерлер бақылауында болып, үй жағдайына көшірілдім. Аман-есен жаным қалып, баламды бауырыма басқаным үшін перзентханадағы дәрігерлер мен медбикелерге алғысым шексіз. Осындай абзал жандардың арқасында көптеген жандар ана бақытын сезінуде. Шүкір, қазір өзімнің де, баламның да жағдайы жақсы, – дейді.
Айта кетейік, 2024 жылы аудан көлемінде перзентханада аман-есен сәби сүю бақытын 1678 ана құшқан. Оның ішінде 5 келіден жоғары 12 сәби дүниеге келсе, 6 келіден асқан алып баланың анасы біздің кейіпкер.
Иә, ана бақытын сезіну – өмірдегі әрбір қыз баласының арманы. Ана атанған, сәби күтіп жүрген барша нәзік жандыларға отбасы бақыты мен ұрпақ адалдығын тілейміз.
Г. САҚТАПОВА
