Шәкірттердің жүрегіне жол тапқан
Ол шәкірт жүрегіне жол таба білген жан. 30 жыл ғұмырын ұрпақ тәрбиелеу ісіне арнап, шаттығы мен қуанышын мектеппен байланыстырған мұғалім. Ол бала жүрегінен туған мамандығын меңгергені үшін шын бақытты. Біз «Жыл мұғалімі» атанып елеулі еңбегінің арқасында абыройы артқан еңбек адамы Арал ауданы, Сексеуіл кентіндегі №-177 орта мектеп орыс тілі мен әдебиеті пән мұғалімі Венера Аймолдаеваның еңбек жолын бүгінгі мақалаға арқау етпекпіз.Венера Жарқынбайқызы теміржолшылар отбасында өмірге келген. Әкесі Жарқынбай Аймолдаев пен анасы Рыскүл Аймолдаева 6 баланы өмірге әкелген жандар. Көбалалы жанұяда туып-өскен қыз жастайынан ата мен әженің тәрбиесін көріп, өнегесін бойға сіңіреді. Мектеп табалдырығынан мұғалім болуды армандап аттаған бойжеткен, Гоголь атындағы институтты орыс тілі мен әдебиеті мұғалімі мамандығы бойынша тәмәмдайды. Еңбек жолын 1993 жылы өзі білім алған мектепте бастаған еді.
– Жас маман болып алдымызға үлкен мақсат қойып болашаққа қадам бастық. Жұмысқа кіріскен күннен бастап, мектептің тыныс-тіршілігіне белсене араласып кеттім. Көпшілік біле бермейтін ақындық қабілетім де бар еді. Көкейімдегі кейбір нәрселерді өлең шумақтарымен өруді бала кезден әдетке айналдырғам. Бұл қасиет әкем Жарқынбайдың «әу» деп айтатын әні мен кітапқұмарлыққа баулуынан бойға дарыса керек. Әкемнің бойындағы көп жақсы қасиеттер оған деген сүйіспеншілігім мен жақын тұтқандығымнан маған сіңген тәрізді. Әкем мақала жазып, үнемі қойын дәптерін тастамай жүретін. Менде де сол әдет бар. Күнделігіме ерекше сезімнен туындаған өлеңдерімді жазып қоямын. Жалпы мұғалім бір мамандықтың аясында шектеліп қалмай үнемі өзін өзі дамытып, бойындағы өзге икемді қырын іздеуі керек деген пікірдемін, – дейді Венера Жарқынбайқызы.
Ізденімпаз мұғалім педагогтар арасында ұйымдастырылатын сайыстарда жеңіс тұғырынан көрініп, білімге құштар шәкірттерін де жетістікке жетелеп жүр. «Үздік бірлестік жетекшісі -2022», «Үздік авторлық жоба» сынды республикалық, облыстық сайыстарда топ жарған.
– Секция жетекшісімін, жас мамандарды тәрбиелеп жүрген тәлімгерлігім тағы бар. Оқушыларым аудандық, облыстық сайыстардың жеңімпаздары. 2002-2007 жылдары сынып жетекшілік жасадым. Менің өмірімде қалған бір оқиға «Қиын оқушымен» жұмыс істеуім болды. Ол қалыпты балалары тәрізді емес. Ерекше қамқорлық пен назар аударуыңды талап етеді. Ондай оқушыны қатарластарынан бөле жармай, ілестіріп жіберу жүгі маған артылғанда тосырқағаным рас. Бірақ мен сол баламен жақын болу арқылы «Қайрат» қайырымдылық тобын құрып, жалғызілікті қарттарға, мүмкіндігі шектеулі баласы бар отбасыларға қолдау ұйымдастырып отырдым, – дейді кейіпкеріміз.
Мұғалім бойында қорқыныш емес, батылдық. Жасқану емес, тәуекелшілдік болу керек деген тәжірибелі мұғалім кейінгі жас мамандарға да үлгі болып келеді. Мұғалім жалындап тұратын мамандық иесі дегенді ұстаным еткен ұстаз, жастардың қиындықтан шыңдалып, керемет мұғалім болып шығатындығын да баса айтты. Және бір сөзінде:
– Әр шәкіртті туған балаңдай жақын тұтып, оған бар махаббатыңды берсең, ол бала ұстазын жанашыр анасындай сезінеді. Және анасын ренжіткісі келмегені тәрізді мұғалімінің де көңілін қалдырмауға тырысады. Жас мамандардың бойынан мен оқушыға деген ыстық ықыласты көргім келеді. Біз 45 минуттық білімді берумен шектелген күні, өзіміздің мәртебелі мамандығымызға кір келтіреміз. Асқақ абыройымызды төмендетеміз. Сондықтан болашақтың иелерін білім мен тәрбие жағынан жетілдіру мұғалімге жүктелгендіктен жауапкершілікті ешқашан жадымыздан шығармауымыз керек, – деді.
Венера Аймолдаева білікті ұстаз болып, ұжымда абыройлы болуымен қатар, отбасылық бақытқа бөленіп 30 жыл оттасқан жолдасы Дастанмен 6 баланы өмірге әкелген аяулы ана. Еңбекке жараған балаларының үлкені дәрігер, кейінгілері мектепте үлгілі оқушы. Міне, ұстаздық Ұлы жолды таңдаған және сол жолда дара болмысын қалыптастыруға тырысқан кейіпкеріміз адал еңбегінің арқасында әріптестеріне құрметті болып отыр.
Назерке МАРАТҚЫЗЫ
