Қотыр ауруынан сақтанайық
Қотыр-жұқпалы тері ауруы. Оны қотыр кенесі жұқтырады. Қотыр кенесінің өсу кезеңі 2-3 аптаға созылады, қотыр ауруы адаммен тікелей қарым қатынас жасаған кезде, қол алысқанда немесе сырқат пайдаланған заттар: төсек, ішкі киім, ойыншықтар арқылы жұғады. Сонымен қатар ауру барлық үй малдарынан, иттен, мысықтан жұғуы мүмкін. Қотыр ауруының негізгі белгісі-терінің қышуы, ол кешке , әсіресе түнде адамға ұйқы бермей мазалайды. Өйткені қотыр кенесі түнде қозғалғыш келеді. Ол терінің үстіңгі қабатымен қозғалып, теріні қышытады. Теріде біртіндеп майда түйін мен көпіршік тәрізді бөртпе пайда болады. Қотырдың өзегі мен бөртпесі көбіне саусақтың арасында, білек буындарының ішкі жағында пайда болады. Одан кейін адамдардың башпайларының ішкі жағына, табанына, алақанына, бетіне шығады. Қотырмен ауырған науқастар зақымданған жерін қасып, ол жерге ірің тудыратын микроорганизмдер ұялап қалады. Сондықтан қотыр асқынған кезде кейде іріңді бөртпелер пайда болады, ол қотырдың негізгі белгілерін бүркемелеп тұрады. Асқынған жағдайда зәрде, қанда өзгерістер пайда болып, буындары қабынып, дене қызуы көтеріледі. Қотырдың алғашқы белгісі білінісімен жедел дәрігерге қаралған жөн.
Ауру үй жағдайында емделген кезде бөлек бөлмеде оқшаулануы керек. Науқас жатқан бөлменің еденін күнде жуып, жиһаздарды сабын, соданың 1-2 пайыздың ертіндісімен сүртіп отырған жөн. Қотыр ауруын жұқтырып алмас үшін қолды жиі-жиі сабындап жуып, апта сайын моншаға түсіп, дененің таза болуын қадағалау қажет.
Қотырды малдардан да жұқтыру мүмкін болғандықтан, үйге жабайы мысықтар мен иттерді жолатпаған жөн. Үй мысықтары мен иттерде аурулардың белгілері байқалса дереу оларды мал дәрігеріне көрсету қажет. Малдарды бағып-күтім жасағанда арнайы жұмыс киім, қолғап кию керек, жұмыс аяқталған соң қолды екі мәрте иіс сабынмен жақсылап жуу қажет.
Қарапайым тазалық шараларын сақтап, қотыр ауруынан сақтанайық, ағайын!
А.Балшамбаева
Арал аудандық СЭБ басқарма
басшысының орынбасары
