Шипагер шарапаты
Қызметтің оңайы жоқ. Бірақ адам жанына араша бола білген ақ халаттылардың жұмысы тіпті күрделі. Қызығы мен қиындығы қатар жүретін осы сала өкілдері талай естелік әңгімелерді айтқанды таңданысымызды жасыра алмаймыз. Талай төтеннен болған жағдайлар мен жаны қысылғандарды қалай аман алып қалғаны жайлы әңгімелер бір жағынан қызықтырып та кетеді. Ал бұл біз қызыққан жағдайлар абзал кәсіп иелерінің нағыз ерлігі. Бейбіт күнде осындай өмір мен өлім майданында маңызды медицина қызметін мойындарына жүк етіп артып, жауапкершіліктен жалтармай жүрген жандардың бірі – Айгүл Махамбетова.Сөзі майда, қолы шипа болып жүрген Айгүл Сақтапбергенқызы 1988 жылы Арал қаласында дүниеге келген. Бала кезден білімін жетілдіріп, біліктілігін халықтың игілігіне жаратуды ойлады. Осылайша қаладағы №14 орта мектепті бітіріп, арман қуып Ақтөбе медициналық колледжіне оқуға түседі. 2009 жылы "Емдеу ісі" мамандығы бойынша қызыл диплом алған кейіпкеріміз бүгінде өз арманының ақиқатқа айналғанына қуанышты.
Иә, қызыл дипломды қолына ұстаған, білімі жетік маманға қашанда сұраныстың жоғары болатыны белгілі емес пе?! Айгүлді де өз ұжымынан көргісі келетіндер аз болмады. Алайда жерлесіміз туған топырағындағы халықтың қамы үшін қызмет жасауды көздеді. Осылайша 2009 жылы А.Байтұрсынов емханасына фельдшер болып жұмысқа орналасты.
Сол жылы субординатор болып ауысқан ол 2014 жылға дейін міндетін мінсіз атқарып, 2014 жылдан бастап аталған емханада медбике болып табан тайдырмай еңбек етіп келеді. Өз жұмысы жайында:
– Мамандықтың жаманы жоқ қой. Күнделікті көріп, естіп жатамыз. Бірі алапат өртпен, бірі тасыған сумен арпалысып, жанын шүберекке түйіп, тәуекелдің тереңіне бойлап, талап етіп жүр. Ажалмен бетпе-бет келіп, қорқынышты жеңу өте қиын. Алайда өзіңнің емес, өзгенің саулығы, өмірі саған аманатталғандағы жауапкершілік тіпті қиын екен. Мен оны осы салаға келгелі анық түсіндім. Алдымызға талай басы ауырып, балтыры сыздаған азаматтар келгенде онымен бірге қиналып, шипа тапса одан бетер қуанамыз. Сондықтан болар, бүгінде барша халықтың алғысын арқалап, батасын алып жүрміз, – деп өзіне ризашылық білдірген халыққа риза екенін бүкпесіз жеткізді.
Абыройлы қызметпен қатар аналық, жұбайлық міндетіне де жауапкершілікпен қарап, көпбалалы ана ретінде 4 перзент тәрбиелеп отырған кейіпкеріміз өз кезегінде қазіргі таңда медицина саласының қарқынды дамуымен қатар халыққа қол жетімділіктің барын қуана айтады.
Оңталап ЖОЛДАСОВ
