Суға түсу кезінде қауіпсіздік ережесін сақтайық

Сырдың аптап ыстығы да тұрғындардың тынышын алуда.Күн ысыған сайын су жағалауларындағы халықтың қарасы көбейетіні мәлім.Отбасы, дос-жаранмен бас қосып, бой сергітіп, суға сүңгуге асыққан халық таң атысымен теңіз жағалауына қарай ағылады.Суда жүзу, күнге қыздырынып, жағажайда демалу әрине адам денсаулығына пайдасы зор.Дегенмен демалыста сақтық әрі қауіпсіздік талаптарын ескеру аса қажет.Жаз айларында су айдындарында азаматтардың суға шомылуы кезіндегі сақтық шараларын сақтамауы салдарынан түрлі оқыс оқиғаларға ұшырауы жиі орын алады. Су айдындарындағы адамдардың өлімінің, қайғылы оқиғалардың басты себебі – суда болу кезінде қарапайым қауіпсіздік жүріс-тұрыс қағидаларын сақтамау болып табылады.Тұрғындарға тек рұқсат етілген аймақтарда ғана шомылуға болатыны үнемі айтылып келеді.Алайда оны елемейтіндер баршылық.Өзендер мен көлдерде, тоғандарда, тоқтау сулар мен шалшық суларда шомылудың қаупі мол. Апаттың айтып келмейтіні белгілі ғой.Үлкенге де, кішіге де суға түсу кезінде аса сақ болу қажет.

Суға әр түрлі жас топтарындағы адамдар түседі.Бірақ суға батқандардың көбісі-жас ер азаматтар.Су айдындарында адамдардың қаза болуының себептері де әртүрлі. Суға батқандардың жартысы ережені бұзған азаматтардан құралса, үштен бірі мас күйінде, енді бірі тыйым салынған орындарда суға шомылғандар,ал қалғандары – үлкендердің қарауынсыз қалған балалар.

Суға түсуге барған адамдар төменде көрсетілген қағидаларды ескеруі қажет!

– қауіпсіз немесе арнайы белгіленген жерлерден, жағажайларда және шомылатын жерлерден бөлек жерлерде суға түсуге;

– суға шомылып жатқан балаларыңызды қараусыз қалдыруға;

– суда ойнауға,тентектік жасауға;

– шомылу барысында камера, доп, ағаштарды пайдалануға;

– жүргінші және көлік көпірінен суға сүңгуге;

– жүрек ауруымен ауыратын адамдарға суға түсуге;

– салқын суда ұзақ болуға;

– ішімдік ішкен жағдайда суға түсуге;

– тыйым салынған жерлерде, терең және лай-қоқыс жерлерде суға түсуге;

– судың қатты ағынына тап болғанда, ағынға қарсы жүзуге;

– бейтаныс жерден суға секіруге;

– түнгі мезгілде суға шомылуға;

– таныс емес жерлерде жүзуге жол бермеу қажет!

Барлық балалар назарына:

– арнайы суға түсуге арналған жерлерден,басқа жерлерге түсуге;

– суға түсу кезінде кемелерге,басқа да жүзу құралдарына жақын баруға;

– таныс емес жерлердегі, жағалаулардағы суға сүңгуге;

– су температурасы төмен болғанда суға түсуге;

– суға сынған банкілерді, әйнектерді және т.б заттарды лақтыруға;

– суда қолдан жасалған жүзу құралдарын пайдалануға;

– суға үлкен адамдардың қарауынсыз шомылуға болмайды.

Демалыс орындарында,сауықтыру лагерьлерінде суда өзін қалай ұстау керектігі жайлы нұсқама плакаттар ілінген. Судың қаншалықты қауіпті екендігін, қандай қасіретке алып келетіндігін барша қауым терең ойлап, басты назарда ұстағандары жөн.

Су айдындарының көбісі шомылуға арналмаған. Бірақ, соған қарамастан, балалар да, ересектер де барып, суға шомылатындары жасырын емес.

Адамның өмірінен артық құндылық жоқ. Сондықтан да, суға түскен кезде қарапайым ережелерді сақтау керек. Сонда ғана тілсіз жаудың қауіп-қатерінен аман қалуға болады.

Жоғарыда айтылған ескертпелерді ескерте келе айтарымыз: Қала тұрғындарын және аудан қонақтарын судағы қауіпсіздік шараларына немқұрайлы қарамауға шақырамыз!

Арал ауданының Төтенше жағдайлар бөлімі