Акция аясындағы қолдау
Білім – адам өміріндегі ең қымбат қазыналардың бірі. Жаңа оқу жылы қарсаңында аз қамтылған, көпбалалы немесе әлеуметтік тұрғыдан қолдауды қажет ететін отбасылардың балаларына көмек көрсету – қоғамның ортақ міндеті. Осы мақсатта елімізде жыл сайын дәстүрлі түрде «Мектепке жол» республикалық акциясы өткізіледі.Атаулы акция биыл да өз жалғасын табуда. Аудандық кәсіподақ комитеті осы бастамадан шет қалмай, акция аясында барлығы 180 балаға оқу құралдарын табыстады.
Бұл шараның басты ерекшелігі – кәсіподақ комитетінің қолдауы мектептер мен балабақшаларда еңбек етіп жүрген қызметкерлердің балаларына арналды. Өйткені білім беру мекемелеріндегі әр қызметкер – оқу-тәрбие үдерісінің бөлінбес бөлігі, балалардың сапалы білім алып, жайлы ортада өсуіне үлес қосушы жандар. Сондықтан олардың балаларына көрсетілген бұл қамқорлық ерекше мәнге ие.
Кәсіподақ комитетінің мұндай игі қадамы – әлеуметтік әділдікті нығайтып қана қоймай, білім саласы қызметкерлерінің арасында өзара сенім мен қолдауды күшейтеді. Ата-аналар кәсіподақ ұйымына жүрекжарды алғыстарын білдіріп, бұл дәстүрдің алдағы уақытта да жалғасын табарына сенім артты.
«Мектепке жол» акциясы – болашақ ұрпаққа деген қамқорлық пен сенімнің белгісі. Бұл бастама арқылы қоғамдағы әлеуметтік әділеттілік нығайып, әрбір баланың арманына қанат бітіруге мүмкіндік жасалады.
«Толқын» ақпарат
