Адал қызмет – ердің ісі
Адам өмірі – өзі өмір сүрген дәуірдің айнасы. Ал сол өмір халыққа қызмет етумен, елдің тыныштығын күзетумен, қоғамның дамуына үлес қосумен өрілсе, оның мәні тіпті тереңдей түседі. Мен үшін сондай тағылымы мол ғұмыр иесінің бірі – көп жылдар бойы басшылық қызмет атқарған әріптес ұстаз Бақытжан Сүйеубаев.Бақытжан аға 1946 жылдың 17 сәуірінде Арал өңіріндегі Бөген ауылдық кеңесіне қарасты Қарашалаң елді мекенінде дүниеге келді. Сол бір қиын кезеңдерге қарамастан, ауыл баласының бойында еңбекке деген құштарлық, білімге деген ынта ерте қалыптасты. Табиғаты қатал, тіршілігі тынымсыз Арал аймағының өзі адамды төзімділікке, сабыр мен шыдамдылыққа тәрбиелейтіні белгілі. Бақытжан ағаның бойындағы осы қасиеттер оның бүкіл ғұмыр жолында айқын көрініс тапты.
Ол Бөген орта мектебінде білім алып, жастайынан қоғамдық жұмыстарға белсене араласты. Мектеп қабырғасында жүргенде-ақ ұйымдастырушылық қабілетімен көзге түсіп, қатарластары арасында сыйлы болды. Бұл қасиеттер кейін оның қызмет жолында үлкен артықшылыққа айналды.
Еңбек жолын Арал қаласындағы №2 мектеп-интернатында пионер-тәлімгер болып бастауы да кездейсоқ емес еді. Жас ұрпақ тәрбиесіне араласу – үлкен жауапкершілік. Осы қызметте жүріп-ақ ол балалармен тіл табыса білетін, оларды ортақ мақсатқа жұмылдыра алатын қабілетін көрсетті. Әр баланың болашағына бейжай қарамай, олардың азамат болып қалыптасуына өз үлесін қосты.
1966–1968 жылдары Кеңес Армиясы қатарында әскери борышын өтеп, өмірдің тағы бір мектебінен өтті. Әскер – ер жігіттің жігерін шыңдап, тәртіп пен жауапкершілікті бойына сіңіретін орта. Бұл кезең Бақытжан ағаның мінезін одан әрі шыңдап, оны нағыз тәртіптің адамы ретінде қалыптастырды.
Әскерден оралғаннан кейін ол аудандық атқару комитетінде қызметін жалғастырып, 1968–1975 жылдары ұйымдастыру бөлімінде нұсқаушы, кейін жалпы бөлім меңгерушісі қызметтерін абыроймен атқарды. Бұл жылдар – оның басқару ісіндегі тәжірибесі қалыптасқан, ұйымдастырушылық қабілеті шыңдалған кезең болды. Әр тапсырманы тиянақты орындап, әр іске жауапкершілікпен қарауы – оны әріптестері арасында беделді маманға айналдырды.
1977 жылы Алматы қаласындағы С.М. Киров атындағы Қазақ мемлекеттік университетінің заң факультетін бітіріп, кәсіби білімін жетілдіруі – оның өзіне деген талабының жоғары екенін көрсетеді. Қызметпен қатар білім алу – кез келген адамның қолынан келе бермейтін іс. Бұл оның алға қойған мақсатына табандылықпен жете білетінін дәлелдейді.
1975 жылдан бастап Бақытжан аға ішкі істер органдарында қызмет атқара бастады. Бұл сала – тек қана заңды білу емес, сонымен бірге адам тағдырына жауапкершілікпен қарауды талап ететін күрделі жүйе. Ол Арал аудандық ішкі істер бөлімі бастығының саяси тәрбие және кадр жөніндегі орынбасары ретінде ұзақ жылдар бойы қызмет атқарды. Бұл қызметте ол тек басшы ғана емес, ұстаз, тәрбиеші бола білді.
Бақытжан ағаның менің өмірімде ерекше орын алуының бір себебі – мені қызметке қабылдап, сенім білдірген жан еді. Ол әр қызметкердің қабілетін танып, оларды дұрыс бағыттай білетін. Жас мамандарға бағыт-бағдар беріп, олардың кәсіби тұрғыдан қалыптасуына ықпал етті. Қатаң талап қоя отырып, әділдік пен адамгершілікті қатар ұстануы – оның басты ұстанымы болды.
Ұжымда тәртіп пен бірліктің сақталуына да ерекше көңіл бөлетін. «Тәртіп бар жерде – нәтиже бар» деген қағиданы берік ұстанып, соны іс жүзінде дәлелдей білді. Оның басшылығымен талай жас қызметкер шыңдалып, нағыз маман болып қалыптасты.
Сонымен қатар, қоғамдық жұмыстардан да тыс қалған жоқ. Арал қаласы, Грибоедов сайлау округі бойынша қалалық кеңестің депутаты болып сайланып, халық сенімін ақтады. Бұл – оның тек қызметте ғана емес, қоғам алдында да жауапкершілікті терең сезінетін азамат екенін көрсетеді.
Бақытжан ағамның еңбегі елеусіз қалған жоқ. Ішкі істер органдарындағы мінсіз қызметі үшін I және II дәрежелі медальдармен, «ҚР ІІМ-нің Ішкі істер органының Құрметті ардагері» медалімен, «Қазақстан полициясына 30 жыл» мерекелік медальдарымен марапатталуы – оның адал еңбегінің айғағы. Сонымен қатар облыстық ішкі істер басқармасы мен аудан әкімдігі тарапынан алған Құрмет грамоталары мен Алғыс хаттары – оның еңбегіне берілген жоғары баға.
1996 жылыдың аяғында подполковник шенімен зейнеткерлікке шыққаннан кейін де ол қоғамнан қол үзген жоқ. 1997–2000 жылдары аудан әкімінің аппаратында заң кеңесшісі және азаматтық қорғаныс штабының бас маманы қызметтерін атқарып, өзінің бай тәжірибесін ел игілігіне жұмсады. Ал 2000 жылдан бастап аудандық ауруханада заңгер болып қызмет істеп, халыққа құқықтық көмек көрсетуді жалғастырды.
Ел ағасына айналған азамат қызметте абыройлы болумен қатар отбасылық бақытқа да бөленді. Жұбайы Айсаулемен 5 бала өмірге әкеліп, бәрін азамат етіп өсірді. Әр қайыссы өмірде өз орындарын тауып, әр салада қызметтерін атқаруда. Тек өкінетіні жанжары Айсауле Қожаниязқызының осыдан 4 жыл бұрын өмірден озғаны.
Биыл 80 жастың төріне шығатын Бақытжан ағаның өмір жолына қарап отырып, бір нәрсені анық аңғарамыз: ол – қандай қызмет атқарса да, адалдықты ту еткен, ел мүддесін жеке басынан жоғары қойған азамат. Оның қарапайымдылығы, кішіпейілдігі, адамдарға деген жанашырлығы – бәрімізге үлгі. Осындай азаматтардың арқасында қоғамда тұрақтылық сақталып, елдің еңсесі биік болады. Бақытжан аға – өз ісінің шебері ғана емес, үлкен жүректі, кең пейілді жан.
Өмірін елге қызмет етуге арнаған, еңбегімен ел құрметіне бөленген абзал азамат Бақытжан Сүйеубаевтің өнегелі өмір жолы кейінгі ұрпаққа әрдайым бағыт-бағдар болмақ.
Жалдыбай ЖАҢАБАЕВ,
Арал аудандық полиция бөлімі
ардагерлер кеңесінің төрағасы,
отставкадағы полиция подполковнигі.
