Сыбайлас жемқорлық – қоғам дамуына төнген қауіп

Бүгінгі таңда еліміздің қарқынды дамуына, әлеуметтік-экономикалық өрлеуіне кедергі келтіретін ең басты кеселдердің бірі – сыбайлас жемқорлық. Бұл құбылыс тек мемлекеттік басқару жүйесінің тиімділігін төмендетіп қана қоймай, қоғамның рухани құндылықтарына да үлкен нұқсан келтіреді. Соның салдарынан халықтың мемлекетке деген сенімі әлсіреп, әділдік қағидаттары бұзылады.

Сыбайлас жемқорлық – мемлекет пен халық арасындағы сенімге сызат түсіретін қауіпті індет. Ол экономиканың дамуын тежеп, инвестициялық ахуалды нашарлатады, әлеуметтік теңсіздікті күшейтеді және құқықтық мемлекеттің негізін шайқалтады. Сондықтан жемқорлықпен күресу – тек бір саланың ғана емес, бүкіл қоғамның басты міндеті.

Жемқорлықтың пайда болу себептері әртүрлі. Олардың қатарында құқықтық сауаттылықтың төмендігі, жеке пайдаға ұмтылу, бақылаудың әлсіздігі және қоғамда адалдық қағидаттарының толық қалыптаспауын атап өтуге болады. Осындай факторлар қоғамда заңға немқұрайлы қарауға алып келеді.

Тәртіп сақшылары мен мемлекеттік органдар жемқорлықпен күресте түрлі шаралар қабылдап, заң талаптарын күшейтіп келеді. Алайда қоғамның белсенді қолдауынсыз бұл індетті толық жою мүмкін емес. Сондықтан әрбір азаматтың санасында «жемқорлыққа мүлдем төзбеушілік» қағидаты қалыптасуы тиіс. Бұл – адал қоғам құрудың негізгі шарты.

«Сыбайлас жемқорлықпен күрес – тек құқық қорғау органдарының ғана емес, бүкіл халықтың ортақ ісі» деген ұстаным әрбір отбасыда, білім беру мекемелерінде және еңбек ұжымдарында кеңінен насихатталуы қажет. Әсіресе, жас ұрпақтың бойына адалдық, әділдік, жауапкершілік сияқты қасиеттерді сіңіру – болашақтың кепілі.

Сыбайлас жемқорлыққа қарсы іс-қимылдың негізі – адалдық пен парасаттылық. Халқымыз ежелден әділдікті ту етіп, шындықты бәрінен жоғары қойған. Бұл ұстаным бүгінгі күні де өз маңызын жойған жоқ. Әрбір азамат өз ісіне жауапкершілікпен қарап, заңды құрметтеп, адал еңбек етуі тиіс.

Қорытындылай келе, сыбайлас жемқорлық – қоғам дамуына зор қауіп төндіретін құбылыс. Онымен күресу – әрбір азаматтың азаматтық борышы. Егер біз жемқорлыққа жол бермей, адалдық пен әділдікті ту етсек, еліміздің болашағы жарқын, іргесі берік болады.

Жемқорлықсыз болашақ – біздің қолымызда!

Ғ. Тоғысова,

Арал ауданының жұмыспен қамту және әлеуметтік бағдарламалар бөлімінің басшысы