Шәкірттер жетістігі – ұстаз мерейі

Адамзат баласы өркениеттің биігіне қарай басқан қадамының негізгі күш берушісі, жетелеушісі - мектеп. Білім ұяларынан әр жылы қаншама мың шәкірттер түлеп ұшып, үлкен өмірге жол тартады. Мектептен алған білім мықты іргетас болып, болашақ мамандық таңдауға негіз салады.

Жақсы мектеп - жас ұрпақты биіктерге самғатады. Ал сол самғаудың бабын да, бағын да келтіретіндер - ұлағатты ұстаз­дар. Мен осындай үлкен миссия­ны атқарушылардың қатарында ұзақ жылдар ұстаз болғанымды мақтаныш тұтамын. Қырық жылдай білім ұясында өткен өмірім мыңдаған шәкірттердің тарыдай болып кіріп, таудай болып шыққандығының куәсі болдым. Сол мектептен шыққан түлектер ондаған жылдардан кейін білім ұясына келіп, өмірлік есеп бергендей мерейтойларын салтанатты өткізіп жатады.

Міне, жақында 2006 жылы №71 қазақ орта мектебінің 11 «А» сыныбын бітіріп шыққан түлектер жиырма жылдық мерейтойларына туған жеріне келіпті. Бұл сынып әлі есімде: іріктелген арнайы сынып аталған олардың қатарында 30 оқушы болатын. Бастауыш сыныпта Зинегүл апай әріп танытса, 5-сыныптан бастап өңірімізге белгілі ұстаз Бақтыгүл Серма­ғамбетова жетекшілік етті. Ал 10-11-сыныптарда сүйікті апай­лары Айнаш Нысанқұлова  ба­ғыт-бағдар берді. Осы сыныпта «Балбұлақ» атты шығарма­шылық топ болды. Оны қазақ тәлі мен әдебиеті пәнінің мұға­лімі Айгүл Ақбергенова жүр­гізген болатын. Және де физика пәнінен Төлеген Көптілеуов ағай, химиядан Жадыра, биологиядан Ханбибі апайлар сабақ берген.

Міне, енді «Түлектер кездесуі» атты мерейтойлық шараға зейнет демалысында отырған ұстаздар­дың қатарында мені де құрметтеп шақырды. Кешегі кіп-кішкентай шәкірттерімнің бүгінде елдің ең­селі азаматтары болғанына қатты қуандым. Мерейтойлық шараны жүргізген Ержан Нақылов пен Нартай Жайназардың ұстаздар тарапына айтқан жылы сөздері, ыстық тілектері көңілімізді шар­ықтатып жіберді. Олардың әрбір айтқан сөзінен, іс-әрекеттерінен ұстаздарға деген зор құрметті көр­гендей болып марқайып қалдым.

Шәкірттеріміздің көбі бүгін­де еліміздің  әртүрлі салалар­ында белді-белді қызметтер ат­қарып жүр екен. Нартай - «Түг­ел», «Берекет» шаруақожалықтарын жүргізіп отырған кәсіп­кер. Ержан болса аудандық МЖК бөлімі басшысының орын­басары. Салтанат Смағұлова - «Мұздалифа» туристік компа­ниясының негізін қалаушы, Ақмарал Жанесенова - аудандық прокуратураның аға прокуроры, Нұрбол Тоғысов - №3 өрт сөндіру бөлімі бастығының орынбасары, Айболат Ерекешов - ҚТЖ-да поезд бастығы, ал Ақбота Бердімұратова, Мөлдір Жұқабаева, Мөлдір Бұғыбаева­лар біздердің ізімізді қуған ұстаздар. Олар да бүгінде шәк­ірт­тер тәрбиелеп, сапалы білім беріп келеді.

Шәкірттер жетістігі - ұстаз­дардың мерейін тасытады. Әрбір шәкірттің өмірлік табыстар­ында, жемісті еңбектерінде мек­теп мұғалімдерінің елеулі үлесі жатыр.

Салтанатты мерейтойдан шәкірттер туралы жақсы ойлар түйіп қайттық.

Сағатай Құдайбергенова,

ардагер ұстаз.