Ағайындылар ашқан кәсіптің өрісі кең

Ауылда кәсіп ашып, оны табыс көзіне айналдыру – үлкен ізденіс пен табандылықты талап етеді. Өз ісін қолға алып, ауыл шаруашылығын дамытуға үлес қосып жүрген азаматтардың бірі – Арал ауданы Қамыстыбас ауылдық округінің тұрғыны Өтеген Шағамбаев. Ол құс шаруашылығын дамытуды қолға алып, інісі Бауыржан Жұмабековпен бірге кәсібінің ауқымын кеңейтіп келеді.
Өтеген Шағамбаев құс шаруашылығын дамытуға 8,4 миллион теңге қаржы бағыттаған. Кәсіпкер бастаған ісін біртіндеп өркендетіп, бүгінде 1400 бас құс сатып алып, шаруашылық көлемін ұлғайтқан. Алғашқы қадамнан басталған кәсіп бүгінде алдағы жоспарларға жол ашып отыр.
Кәсіпкердің айтуынша, ауылда кәсіп жүргізу оңай болмаса да, көздеген мақсатқа жету үшін еңбектеніп, істі жүйелі түрде дамыту қажет.
«Кәсіпті бастау – бір бөлек, оны тұрақты дамыту – үлкен жауапкершілік. Құс шаруашылығын қолға алғандағы мақсатым – сұранысқа сай өнім ұсынып, өз ісімді кеңейту. Қазір інісімен бірге шаруашылықты дамытуға күш салып келеміз. Өнімдерімізге қызығушылық танытып, тапсырыс беруге ниет білдірушілердің бар екені қуантады. Алдағы уақытта құс санын көбейтіп, кәсібімізді одан әрі дамытсақ дейміз», – дейді Өтеген Шағамбаев.
Шаруашылықты дамытуда кәсіпкердің інісі Бауыржан Жұмабеков те бірге еңбек етіп келеді. Ағайындылар ортақ істі бірлесе жүргізіп, күнделікті шаруаны ұйымдастыруға күш жұмсауда. Құс өсіру тұрақты күтімді, ұқыптылықты және жауапкершілікті қажет ететіндіктен, мұнда күн сайынғы еңбектің маңызы зор.
Қазіргі таңда шаруашылық өнімдеріне сұраныс танытушылардың болуы кәсіпкерлердің алдағы жоспарларына сенім ұялатады. Олар кәсібін кеңейтіп, өнім көлемін арттыруды көздеп отыр.
Ауылда кәсіптің дамуы жергілікті экономиканың нығаюына ықпал етеді. Өтеген Шағамбаевтың бастамасы мен ағайындылардың бірлескен еңбегі ауыл шаруашылығындағы кәсіпкерліктің мүмкіндігін көрсетеді. Бүгінгі қолға алынған істі ертеңгі ірі шаруашылыққа айналдыру – кәсіпкердің алға қойған негізгі мақсаты.