Құс шаруашылығын қолға алған қос кәсіпкер

Ауылдың берекесі – адал еңбекте, елдің ырысы – кәсіптің өркендеуінде. Бүгінде ауылдық жерлерде мемлекеттік қолдауды тиімді пайдаланып, өз кәсібін бастауға бел буған азаматтар қатары артып келеді. Соның бір дәлелі – Арал ауданына қарасты Қарақұм және Қамыстыбас ауылдық округтерінде құс шаруашылығын қолға алған кәсіпкерлердің бастамасы. Олар жеңілдетілген несие мүмкіндігін пайдаланып, ауыл шаруашылығының бір бағытын дамытуға ден қойған.

Қарақұм ауылдық округінің тұрғыны Еркін Нарегеев кәсіпкерлікке «Ауыл аманаты» бағдарламасы арқылы қадам басты. Ол бағдарлама аясында 4,4 млн теңге көлемінде жеңілдетілген несие алып, құс шаруашылығын қолға алған. Бүгінде кәсіпкердің шаруашылығында 530 тауық бар. Негізгі бағыты – жұмыртқа өндіру және оны саудаға шығару.

Кәсіптің көзін тауып, еңбектің берекесіне сенген Еркін үшін бұл – жай ғана табыс көзі емес, болашаққа бағытталған маңызды қадам. Өйткені кез келген шаруашылықтың өркендеуі күнделікті күтімге, табандылыққа және істі жүйелі ұйымдастыруға байланысты. Құс өсіру де үлкен жауапкершілікті талап етеді. Тауықтарды жеммен қамтамасыз ету, қора-жайдың тазалығын сақтау, олардың күтіміне көңіл бөлу және жұмыртқаны уақытылы жинау – тынымсыз еңбектің бір бөлігі.

Кәсіпкердің айтуынша, мемлекеттік қолдау оған өз ісін бастауға мүмкіндік беріп, алға нақты мақсат қоюына жол ашқан.

– «Ауыл аманаты» бағдарламасы өз кәсібімді бастауға жақсы мүмкіндік берді. Жеңілдетілген несие алып, құс шаруашылығын қолға алдым. Қазір 530 тауық өсіріп, жұмыртқаларын сатумен айналысып отырмын. Ең бастысы – еңбектеніп, бастаған істі жүйелі түрде дамыту. Алдағы уақытта шаруашылықты кеңейтіп, өнім көлемін арттыруды жоспарлап отырмын, – дейді Еркін Нарегеев.

Құс шаруашылығын дамытып отырған тағы бір кәсіпкер – Қамыстыбас ауылдық округінің тұрғыны Өтеген Шағамбаев. Жеке кәсіпкер мемлекеттік қолдаудың мүмкіндігін пайдаланып, 2,5 пайыздық жеңілдікпен 8,4 млн теңге несие алған. Ол жаңа істі інісі Бауыржан Жұмабековпен бірге қолға алып, шаруашылықты бірлесе дамытуға ниетті.

Ағайындылардың ортақ мақсаты – құс шаруашылығының мүмкіндіктерін тиімді пайдаланып, кәсіптің ауқымын кеңейту. Бұл бастама отбасылық еңбекті ұштастырып қана қоймай, ауылда кәсіпкерлік мәдениетін қалыптастыруға да ықпал етеді. Себебі ауылдағы әрбір жаңа іс – елді мекеннің экономикалық әлеуетін арттыруға бағытталған қадам.

Жалпы, құс шаруашылығы – ауыл жағдайында дамытуға болатын, тұрақты еңбекті қажет ететін салалардың бірі. Жұмыртқа күнделікті тұтынылатын азық-түлік өнімдерінің қатарында болғандықтан, оған деген сұраныс та маңызды. Дегенмен кәсіптің табысты болуы үшін өнім сапасын сақтау, жем-шөп шығынын тиімді жоспарлау, санитарлық талаптарды орындау және өткізу нарығын қалыптастыру қажет. Осы бағытта жүйелі жұмыс жүргізу кәсіпкерлерге шаруашылықты біртіндеп кеңейтуге мүмкіндік береді.

Ауыл кәсіпкерлеріне қолдау көрсету – ауылдың әлеуетін арттырып, тұрғындардың өз мүмкіндігін іске асыруына жол ашатын маңызды тетік. «Ауыл аманаты» бағдарламасы аясында берілетін жеңілдетілген несиелер кәсіп бастауға ниетті азаматтардың қаржылық мүмкіндігін кеңейтіп, ауыл шаруашылығы саласындағы жаңа бастамаларға серпін береді. Алайда мемлекеттік қолдаудың нәтижесі оны тиімді пайдаланып, істі тұрақты жүргізуге байланысты.

Қарақұмдық Еркін Нарегеев пен қамыстыбастық Өтеген Шағамбаевтың бастамасы – ауылда кәсіп ашып, еңбегімен табыс табуға ұмтылған азаматтардың ізденісін көрсететін мысал. Бірі 530 тауық өсіріп, жұмыртқа өндірісін жолға қойса, екіншісі інісімен бірге құс шаруашылығын дамытуға кіріскен. Екі кәсіпкердің де мақсаты ортақ – мемлекеттік қолдауды тиімді пайдаланып, еңбектің нәтижесін көру, бастаған істі өркендету және тұрақты кәсіп қалыптастыру.

Ауылдың әлеуеті тек табиғи байлығымен немесе шаруашылықтың ауқымымен өлшенбейді. Оның басты байлығы – еңбек етуге ынталы, жаңашылдыққа ұмтылатын, өз болашағын өз қолымен қалыптастыруға дайын азаматтары. Осындай азаматтардың бастамасы қолдау тауып, кәсібі өркендеген сайын ауыл тіршілігі де жандана түседі.

Н. МАРАТҚЫЗЫ