Бүгін – Денис Теннің туған күні
Бүгін − мұз айдынының мұзбалағы Денис Теннің туған күні. Көзі тірі болғанда ол 30 жасқа толар еді, деп хабарлайды Egemen.kz.Қыршыннан қиылған ғұмыр туралы «Egemen Qazaqstan» газетінің тілшісі Ғалым Сүлеймен «Мұз айдынының мұзбалағы» мақаласында жазған.
Денис 1993 жылдың 13 маусымында Алматы қаласында дүниеге келді. Бала кезінен ол таэквандо, теннис, акробатика, каратэ, жүзу секілді спорттың сан алуан түрімен айналысты. Сонымен қатар фортепиано, би және кескіндеме мектебінде тәлім алып, балалар хорында ән айтты. Алты жасынан мәнерлеп сырғанауға бар назарын аударды. Шеберлігін шыңдау мақсатында ол анасымен бірге Мәскеуге қоныс аударды. Кейіннен АҚШ-қа аттанды. Әр жылдары асқан дарын иесі Николай Морозов, Фрэнк Кэролл, Рафаэль Арутюнян, Елена Буянова, Татьяна Тарасова сынды майталмандардың қол астында жаттықты.
Дениc Тен 2005 жылы алғаш рет Қазақстан чемпионатында топ жарса, содан кейін тағы төрт рет жеңіс тұғырының ең биік сатысына көтерілді. 2009 және 2012 жылдары жастардың әлем біріншілігінде төртінші орынға табан тіреді.
Ересектер арасындағы жарыста Денистің ең алғашқы елеулі табысы – 2011 жылы елімізде өткен қысқы Азия ойындарының алтын медалі. 2013 жылы Канадада өткен әлем чемпионатында отандасымыз мінсіз өнер көрсетіп, күміс медальды иеленді. Ол тек Патрик Чаннан 1,3 ұпай ғана қалып қойды. Негізінде бұл бәсекеде Теннің мерейі үстем болған еді. Оны барша маман мойындады. Бірақ әділдікті белден басқан төрешілер жеңісті жергілікті спортшыға әперді.
2014 жылы Сочиде алауы тұтанған Олимпия ойындарында Теннің асқан шеберлігіне дүйім жұрт таңдай қақты. Шыны керек, ол кезде жерлесіміз жеңіс тұғырына көтеріледі деп ешкім күтпеген еді. Себебі қысқа бағдарламада 84,06 ұпай жинаған Денис тоғызыншы орынды қанағат тұтты. Оның үстіне, бір рет құлап тұрғаны бар. Есесіне еркін бағдарламада ең бір күрделі элементтерді мінсіз орындаған ол 171,04 ұпай олжалады. Нәтижесінде, жаттығудың екі түрінде 255,10 ұпайға иелік еткен отандасымыз қола медальды мойнында жарқыратты. Бұл жарыстың бас жүлдесі жапониялық Юдзуру Ханюға бұйырса, күміс жүлдені канадалық Патрик Чан еншіледі. Нәтижесінде, Тен өз еліне Олимпиаданың алғашқы медалін сыйлады.
2015 жылы Шанхайдағы әлем чемпионатында испаниялық Хавьер Эрнандес пен жапониялық Юдзуру Ханюды алға жіберген Денис қола жүлдені олжалады. Одан бөлек, атақты спортшы «Төрт құрлық чемпионаты» мен Дүниежүзілік Универсиаданың жеңімпазы атанып, басқа да көптеген дүбірлі додада дараланды. Өмірінің соңғы кезеңінде ол жарақатына байланысты байрақты бәсекелердің біразына қатыса алмады.
Денистің есімі - ел есінде. Алматыда оған ескерткіш, өзі тұрған үйге мемориал тақтасы орнатылды. Деректі фильм түсіріліп, Астана мен Алматы қалаларында саңлақ спортшыны еске алуға арналған халықаралық турнир жыл сайын өтіп тұрады. Оған әлемнің әр қиырынан келген атақты мәнерлеп сырғанаушылар қатысады.
