Еркін күрестен аудандық ашық турнир өтті

Ағымдағы жылдың 1-2 қараша күндері Арал ауданы Сазды елді мекеніндегі №60 орта мектебінің спорт залында Жұбай ата Байдаулетовтың 140 жылдығына орай еркін күрестен жасөспірімдер арасында ашық турнир өтті. Тартысты додаға 2014-2015, 2016-2017 жылғы спортшылар қатысып, бос кілем төрінде бақ сынасты. Ашық турнирде аудан әкімінің орынбасары Е.Әбішев салауатты өмір салтын ұстанудың маңызына тоқталып, қатысушыларға сәттілік тіледі.
Мұнан кейін жарыстың демеушісі Қожабайұлы Әділ сөз алып, турнирдің өткізілуіне өз ризашылығын білдірді.
Биыл мамыр айында Сазды елді мекенінде еркін күрестен №19 Арал ауданының олимпиадалық резервтің мамандандырылған балалар мен жасөспірімдер мектебінің бөлімшесі ашылған болатын. Жарты жыл бойы дайындалып жүрген жас палуандардың шеберлігін көрсету және ауданымызда жаттығып жатқан басқа да жас спортшылармен байланыс орнату мақсатында аудандық деңгейде өткізілген турнир үлкен қолдауға ие болды.
Жарысқа ауданның талантты жасөспірімдерімен қатар, Ақтөбе облысынан келген жас палуандар да қатысты. Жарыс барысында 11 салмақ категориясында бәсекелестік орын алды. Бұл шара жас спортшыларға өз мүмкіндіктерін көрсету, тәжірибе алмасу және достық қарым-қатынастар орнату үшін тамаша мүмкіндік болды.
Нәтижесінде 2014-2015 жылдары туылган жасөспірімдер арасында 26 кг салмақ дәрежесі бойынша Аманөткел ауылдық округінен Төрахмет Алдияр, 30 кг салмақ дәрежесі бойынша Ақтөбе облысынан Қожахмет Жансерік, 32 кг салмақ дәрежесі бойынша Сазды ауылдық округінен Мырзабекұлы Мұхаммедәли, 35 кг салмақпен Арал ауданының атынан Жарылқасынұлы Хасан, 38 кг салмақ дәрежесі бойынша Арал ауданының атынан Сәдуақас Нұрислам және +40 кг салмақ дәрежесі бойынша Аққұм ауылдық округінен Жақсылық Ақжігіт жүлделі І орынды еншіледі.
2016-2017 жылдар арасында 20 кг салмақ дәрежесі бойынша Аманөткел ауылдық округінің атынан Мамай Тәңірберген, 23 кг салмақ дәрежесі бойынша Арал қаласынан Ермек Қуаныш, 26 кг салмақ дәрежесі бойынша Аманөткел ауылдық округінен Жасұланұлы Санжар, 29 кг салмақ дәрежесі бойынша Аманөткел ауылдық округінен Қанатбай Мұзаффар және 32 кг салмақ дәрежесі бойынша Сазды ауылдық округінің атынан Қожабай Нариман І орынды иеленді.
Жарыс қорытындысы бойынша жеңімпаздар мен жүлдегерлер Арал ауданы әкімдігінің арнайы дипломдарымен марапатталды. Сонымен қатар, демеушілердің ұсынған арнайы медальдары мен естелік сыйлықтары да табысталды.