Шалғайдағы жұртпен жағымды кездесу
Атанши. Шалғайдағы елдің күнкөрісі-төрт түлік. Әр жылды табыспен түйіндеп келе жатқан атаншилықтар мал шаруашылығымен қатар, кәсіптің де қыр-сырын меңгерген. Бәрінен бұрын мұндағы ел үшін қуанышты жайт, ауылдағы медициналық бекетке жаңа жедел-жәрдем автокөлігінің берілуі. Шындығында, ауырған жанды аудан орталығына дер кезінде жеткізе қою ауылдағылар үшін аса қиын еді. Енді бұл мәселе шешімін тапты деп қуанады ауыл тұрғындары. Аталған ауылдың тұрғындармен жүздескен аудан әкімі М.Оразбаев, елдегі есептік кездесу барысында атқарылған өзге де істерге қанықты. Ауылдық учаскелік полиция инспекторы А.Саматұлы елдегі тіркелген қылмыстық ахуалдар мен өзге де заң бұзушылықтарға тоқталды. Айтуынша, ауылда өткен жылы ешқандай қылмыстық ахуал тіркелмеген. Ал, ауылішілік кейбір заң бұзушылықтардың орын алып тұратынын жоққа шығармады. Мұнан соң, ауылда түрлі салада атқарылған жұмыстар жайында Атанши ауылдық округінің әкімі Е.Серікбаев хабарлама жасады. Баяндама барысында бірқатар жұмыстардың жүйелі қолға алынғандығынан хабардар болған аудан басшысы М.Әуесұлы 2017 жылы аудан көлемінде атқарылған жұмыстар жөнін жан-жақты баяндады.Иә, ел болған соң қажеттілік туындамай тұрмасы анық. Зейнеткер, ардагер ұстаз Т.Төлебаев ауыл тұрғындары атынан бірқатар ұсыныс білдірді. Олардың алғашқысы болып ауылға «Халықаралық Аралды құтқару қоры» арқылы берілген жедел-жәрдем автокөлігіне жүргізуші қажет екендігі және елдегі ескі мектеп ғимаратын балабақшаға бейімдеу мәселесі. Бұдан бөлек қыс мезгілдерінде ауырлық тудыратын жолдың жайы да назардан тыс қалмады. Өз кезегінде аудан әкімі М.Оразбаев жолдың жұмысы бүгін-ертең қолдан келе қоймасын ашық айтып, өзге мәселелерді жыл ішінде шешуге жұмыс жасайтындығын жеткізді.
Алтынбек БИСЕНОВ.
