Ел тілегі әркез ескеріледі
Бекбауыл. Бекбауылдықтар үшін өткен тауық жылы табысты болды деуге толық негіз бар. Басқасын былай қойғанда, электр жарығын тұтынуда күні кешеге дейін тапшылық көріп келген ауыл халқы өткен жылы бұл мәселеден толықтай арылды. Одан өзге де қолға алынған жұмыстар легі жоқ емес. Бұл туралы есептік кездесу барысында ауылдық округ әкімі Ә.Сейітовтың тарапынан толыққанды айтылды. Есептік кездесу барысында ауылдық учаскелік полиция инспекторы Д.Ысқақов хабарлама жасаса, артынша ауыл әкімі атқарылған істерге байланысты кезекті баяндама желісін аудан әкімі М.Оразбаев пен ауыл тұрғындарының назарына ұсынды. Мұнан соң, аудан әкімі М.Оразбаев 2017 жыл ауданымыз үшін табысты жыл болғанын алға тартып, өткен жылы қолға алынған жұмыстарды жан-жақты баяндап, тұрғындар тілегіне құлақ түрді.Ауыл тұрғыны, зейнеткер Ш. Мыршаев ауылдағы жарықтандыру жұмыстарын әлі де жандандырып, ескі бағаналарды қайта жаңаласа деген ұсынысын айтып, ауыл әкіміне жаңа қызметтік автокөлік сұрады. Зейнеткер, Т.Садықов ауыл мектебінде оқитын балаларды тасымалдауға көлік сұраса, Үкілісай елді мекенінің тұрғыны, зейнеткер О.Әлиев жаңадан ашылған мектеп ғимаратының жанындағы шағын орталықтың әлі күнге жұмыс жасамай тұрғандығын жеткізді. Мұнан кейін де ауыл тұрғындары осы өңірге оң көзқарас танытып жүрген аудан әкіміне өздерінің ризашылықтарын жеткізіп жатты. Елдің тілегін ескерген аудан басшысы айтылған мәселелер аяқсыз қалмайтындығын жеткізді.
Алтынбек БИСЕНОВ.
