Тоқабайдағы толымды істер
Жіңішкеқұм. Толымды істер тізбегі Тоқабай елді мекенінде де жеткілікті. Әсіресе, ауыл спортына деген қолдаудың лебі ерекше сезіліп келеді. Нәтижесі көрініп те жатыр. Мәселен, ауылдағы бокстан білікті жаттықтырушы Н.Сариевтың шәкірттері бірнеше мәрте облыстық, республикалық чемпионаттарда топ жарып, мықтылығын дәлелдеді. Бұл саладан өзге де жұмыстардың нәтижесі көңіл қуантарлық. Ол жөнінде есептік кездесу барысында ауылдық учаскелік полиция инспекторы С.Алматұлы мен Жіңішкеқұм ауылдық округінің әкімі М.Әлішев хабарлама жасады. Айтуларынша ауылда қылмыстық ахуал қалыпты, мал шаруашылығы мен кәсіпкерлік саласында айтарлықтай оң өзгерістер бар. Осы жылы да ата кәсіпті одан әрі жандандырамын деушілер жоқ емес. Мемлекет тарапынан жасалып жатқан қолдауларды сезініп келе жатқан ауылда болған аудан әкімі М.Оразбаев аудан көлемінде 2017 жылы қолға алынған жұмыстар жайын арнайы бейнесюжет арқылы ауыл тұрғындарының назарына ұсынды. Одан өзге де қосымша мәліметтерді тұрғындар назарына салып, ауылда шешімін таппай келе жатқан бірқатар мәселелердің барын жоққа шығармады. Кезек ұсыныс-пікірлерге ойысқан соң №20 балалар және жасөспірімдер спорт мектебінің Тоқабай бөлімшесінде бокс бапкері ретінде шәкірт тәрбиелеп жүрген Н.Сариев осы салаға ерекше қолдау танытқан аудан әкіміне ауыл халқының атынан шынайы ризашылығын жеткізді. Артынша, түрлі жарыстарға қатысып жүрген мектеп оқушыларына шағын сыйымдылықтағы автокөлік қажет екендігін және ауылға балабақша ашу керектігін айтты. Мұнан соң, ауыл тұрғыны, зейнеткер Ү.Қуатов атқарушы билік тарапына өзінің алғысын білдіріп, ауылда тұрғызылып жатқан ұялы байланыс мұнарасының жұмысы аяқсыз қалмаса екен деген тілегін жеткізді. Сондай-ақ, Қ.Бердімағанбетовтың 85 жылдығын осы жылы аудан көлемінде атап өтіп, атына туған жерінен көше берілсе деген ұсынысын жеткізді. Бұл мәселелерді назарға алған аудан әкімі М.Оразбаев алдағы уақытта түскен ұсыныстарға байланысты бірлесе жұмыс жасайтынын жеткізді. (Есепті кездесуде облыстық жерді пайдалану мен қорғау басқармасының басшысы Қ.Тоғызбаев болды).
Алтынбек БИСЕНОВ.
