Тазалық мәселесі күн тәртібінен түспек емес

Кеше аудан әкімі Серік Сермағамбетовтың төрағалығымен кезекті санитарлық шатабтың отырысы өткізілді.

Күн тәртібіне сәйкес жиын барысында сектор жетекшілерінің тазалықты қамтамасыз ету бағытында және орын алған құқық бұзушылықты анықтау мақсатында атқарған жұмыстарының есебі тыңдалды.

Алғашқы болып, І-сектор бойынша топ жетекшісі аудан әкімінің кеңесшісі Т.Сүлейменов өзіне тиесілі аумақ бойынша атқарылған жұмыстарды хабарлап өтті. Белгілі болғандай аталған сектор бойынша ағымдағы ай көлемінде тазалық қағидаттарын бұзған 1 тұрғынға айыппұл, 5 тұрғынға ескерту шарасы көрілген. Сонымен қатар, көше комитеттерімен жиын өткізіліп, тұрғындар арасында қоқыстарды тиісті орындарға шығару үшін «Қуанышбек» ЖШС-мен арнайы келісім-шарт орнатуға шақыру бағытында жұмыстар жасалған.

Одан әрі, ІІ-сектор бойынша сөз алған қала әкімінің орынбасары Ә.Сейітов тұрғындар қоқыс төгуді әдетке айналдырған 6 орынға арнайы тыйым салу тақтайшалары орнатылып, бір айдағы рейдтік шаралар барысында 4 тұрғынға ескерту, 2 тұрғынға айыппұл салынғандығын атап өтті.

Мұнан соң, ІІІ-секторға жауапты аудан әкімінің орынбасары Б.Жұмағұлов тазалықты ретке келтіру бағытында атқарылған жұмыстарды тарқата келе, қазан айында жүргізілген рейдтік жұмыстар барысында 5 тұрғынға айыппұл, 3 тұрғынға ескерту шарасы көрілгендігін жеткізді. Ал, IV-секторға жауапты қала әкімінің міндетін атқарушы Р.Жанаев өзіне тиесілі аумақтың талдамалы төлқұжатын баяндай келе, рейд барысында 3 тұрғынға айыппұл, 1 тұрғынға ескерту шарасы көрілгенін айтты.

Сонымен қатар жиын барысында V-секторға жауапты аудан әкімінің орынбасары Е.Талекеновтың, VI-секторға жауапты аудан әкімінің орынбасары Е.Әбішевтың, VII-секторға жауапты аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы А.Тасқынбаевтың және VIII-секторға жауапты «Нұр Отан» партиясының аудандық филиалы төрағасының бірінші орынбасары Т.Қанатовтың тазалық жұмыстарын үйлестіру бағытындағы баяндамалары талқыланды.

Жалпы қала бойынша 8 сектордың жұмысын жекелей талдап өткен аудан басшысы әр сектор бойынша орын алған кемшіліктерді ортаға салып, тазалықты тиісті деңгейде үйлестірмеген сектор жетекшілерінің жұмысын қатаң сынға алды. Соның ішінде тазартылған аумақтардың қайта-қайта бүлінуіне жол берген секторлар бойынша рейдтік жұмыстардың көңіл көншітпей тұрғанын айтқан аудан басшысы, бұл арада әр учаскелік полиция қызметкерлерінің де жұмысы мүлде мардымсыз екендігін жеткізді. Сондықтан алдағы уақытта халықтың ауық-ауық төккен қоқысының ізінде жүрмей, қоршаған ортаны ластамаудың алдын алу бағытындағы жұмыстарды күшейтіп, рейдтік шараларды үздіксіз жүргізе отырып, тәртіпке бағынбаған тұлғаларға қатаң шаралар қабылдау қажеттігін ескертті.

Санитарлық штаб отырысының қорытындысымен аудан әкімі барлық сектор жетекшілеріне анықталған кемшіліктерді жойып, қаланың үнемі таза қалпында болуын қамтамасыз ету бағытында нақты хаттамалық тапсырмалар жүктеді. Бұдан бөлек, барлық дербес бөлім басшыларына, қала, кент, ауылдық округ әкімдеріне тазалық шараларына белсене араласып, ортақ мүдде жолында жұмыла жұмыс жасауға шақырды.