Аралдықтар "Бүкіл қазақстандық ағаш отырғызу" акциясына үн қосты

«Бір тал кессең, он тал ек...» деп ұрпағына ұлағат еткен текті ұлтымыз ағаш егудің игілігін тегін өсиет етпесе керек. Иә, әрбір ағаш қандай да бір тіршілік иесінің пайдасына асса, бір құс ұя салып, жемістерін жесе, бір адам көлеңкесін саялап, кәдесіне жаратса, осының өзі үлкен сауапты іс. Ағаштың экологиялық мәселені, ғаламдық жылынуды реттеуде және топырақты бекітуде де маңызы зор екендігі баршамызға аян.

Соның ішінде, өңірімізде көркейту-көгалдандыру жұмыстарына басымдық берудің мәні зор екендігін тереңінен ұғынған аралдықтар бүгін «Бүкіл Қазақстандық ағаш отырғызу» акциясы аясында арша және терек көшеттерін отырғызды.

Аудан әкімі Серік Сермағамбетов бастаған тал егу акциясына аудан активі, аудандық мекеме-кәсіпорын қызметкерлері, ардагерлер мен жастар қатысып, республикалық акцияның жүйелі өтуіне ат салысты. Ел Тәуелсіздігінің 30 жылдық мерейтойы қарсаңында ұйымдастырылып жатқан ағаш егу шарасы барысында Арал қаласындағы Әбдіжәміл Нұрпейісов музей үйінің алаңына ағаш отырғызу шарасында 60 астам ағаш көшеттері егілді. Акцияның негізгі мақсаты – туған өлкені көркейту-көгалдандыру, яғни жасыл желекке айналдыру.