Аудан әкімі жұмыс сапарымен ауылдық округтерде болды

Сенбі күні аудан әкімі Серік Сермағамбетов жұмыс сапарымен Аманөткел ауылдық округінде болды. Алдымен аудандағы қуаңшылық салдарын жою бағытында жасалып жатқан жұмыстардың бірі Ақбасты, Қаракөл көлдері мен Қаражар өңіріндегі 2500 гектар шабындық және жайылымдық жерлер суландыру бағытындағы Ералы каналын қазу жұмыстарымен танысты. Мұнан соң Аманөткел ауылдық округіндегі Бұрмақұлақ арнасы және Аспай суағытқысының жағдайын бақылады. Елді мекен жанындағы шабындық және жайылымдық жерлерге су баратын «Ырысты» және «Жасұлан» каналдарындағы су реттегіш тоспаларының жағдайын көрген аудан басшысы - канал жиектерін су шайып кетпеу мақсатындағы жұмыстарды әлде де күшейте түсу және дария суы елді мекенге қауіп туғызбауы керектігін айтты.

Мұнан соң аудан басшысы Аманөткел ауылдық округінде «Ауыл - ел бесігі» жобасы аясында салынып жатқан денешынықтыру және сауықтыру кешенінің құрылысына барды. Құрылыс алаңында мердігер мекеме өкілі атқарылып жатқан жұмыстардың барысын түсіндіріп өтті. Қазіргі таңда нысанның іргетасы құйылып біткен, жылу қазандығының құрылысы толықтай аяқталған. Қабырғаларын тұрғызу жұмыстары жүріп жатыр. Құрылыс жұмыстарын «Нұр- техсервис» ЖШС жүргізуде.

Одан кейін аудан әкімі Қамыстыбас ауылдық округіндегі «Ауыл - ел бесігі» жобасы аясында салынып жатқан денешынықтыру және сауықтыру кешенінің құрылыс жұмыстарымен танысты. Бүгінде спорт кешенінің қабырғаларын тұрғызуға дайындық шаралары жасалуда, жылу қазандығының құрылысы аяқталуға жақын. Аудан әкімі мердігер мекеме өкіліне барлық жұмыстардың сапалы әрі тиянақты жүргізілуін қадағалауды тапсырды. Айта кетейік, құрылыс жұмыстарын «ДИАС - ҚҰРЫЛЫС РГ» ЖШС жүргізуде.