Кәсіпкерлік көкжиегі
Ақирек ауылдық округі 2005 жылдан бастап Қамыстыбас ауылдық округінен өз алдына бөлініп шықты. Ауылдық округке Ақбай елді мекені қарайды. Бүгінде онда шаруа қожалықтар, жеке және дара 65 кәсіпкерлер тіркелген. Оның ішінде ортақ меншікке негізделген жанұяның кәсіпкерлігі түріндегі 43 шаруа қожалығы бар. Шаруа қожалықтар негізінен Ақбай шаруашылығы кооперативінен бөлініп шығып қазіргі кезде егін және мал шаруашылықтарымен айналысуда. Атап айтар болсақ, «Ақпан», «Мұра», «Сұлтан», «Тағыберген» шаруа қожалықтары «Сыбаға», «Құлан» бағдарламалары арқылы мүйізді ірі қара, жылқы малдарын алып мал шаруашылығымен және мал азығын дайындаумен айналысып отыр. Сонымен қатар, «Асхат», «Нұр - Дана», «Құрдастар» ,«Нұр-Қанағат» секілді өзге де шаруа қожалықтары егінмен айналысып, шаруашылықтарын шалқытуда. Мәселен, ауылдық округ бойынша биыл 25 шаруа қожалығы 60 гектар жерге бақша өнімдерін ексе, 4 шаруа қожалығы мал азығын дайындау үшін 52 гектар жерге жаңа және көне жоңышқа екті. 
Құс өсіру цехыАуылдық округте құс және мал өсіру, бордақылау, азық-түлік сату, жолаушылар тасымалдау такси қызметі, қоғамдық монша мен саумал сүт өнімдерін өндіру бойынша 22 жеке кәсіпкер өз кәсіптерін дөңгеленту үстінде. Оның ішінде, еңбегінің рахатын көріп жүрген кәсіп иесі Гүлнар Әлібаева былтыр «Өңірлік инновациялық орталығы» арқылы 16 миллион теңге несие алып, құс өсіру бағытындағы шаруашылығын бастады. «Арал-құс» СПК цехы ауылдың іргесінен өтетін Батыс-Еуропа-Батыс Қытай жол бойының маңында орналасқан. Құс шарушалығында қазіргі таңда Ресей елінен әкелінген италияндық панда тұқымдастарына жататын қаз және үйрек балапандары өсіріліп жатыр. Сонымен бірге кәсіпкер жоңышқа, басқа да құсқа қажетті дәнді дақылды өсіру үшін бағдарлама негізінде қосымша 3 миллион теңге несие алып, бүгінде кәсібінің көкжиегін кеңейтуде. Алты адам еңбек ететін ұжымның есебінде екі мыңға жуық қаз үйрек бар. «Бастау» жобасының аясында жұмыс орындарын ашып, кәсібін жүргізені үшін «Арал-құс» СПК жетекшісі Гүлнар «Атамекен» Ұлттық кәсіпкерлер палатасы басқармасы төрғасының Алғыс хатымен марапатталып, жобасы үздіктер қатарына енді. Иә, ылайым, кәсіпкерлеріміздің жоспарлары ойдағыдай болып, ісі оңға басқанын қалаймыз. Құс цехынан келер тиімділік аз болмайды. Біріншіден, бұл өндіріс азық-түлік қауіпсіздігін қамтамасыз етуге үлесін қосады. Екіншіден, өнім бағасы сырттан тасымалданатын тауық жұмыртқасымен салыстырғанда арзандайды. Үшіншіден, жаңа жұмыс орындары пайда болып, адамдар жұмыспен қамтылады. Сонымен қатар, жергілікті бюджетке түсім түсіреді.
Акбай өнімдері сатылымдаАқбай ауылында биыл 118,5 гектар жерге азықтық және диеталық өнімдер болып табылатын қарбыз, қауын, қияр, памидор және асқабақ сияқты бақша өнімдері егілді. Қазіргі өнім жинау науқаны кезеңінде әзірге 140 тонна қауын-қарбызбен 2 тонна асқабақ өнімдері жиналды. Шаруа қожалықтары жоңышқа секілді 1200 тонна мал азығын ауыл тұрғындарымен бірлесе отырып жиды. Енді алажаздай еткен еңбектің, берекетін көруде. Сәрсенбі күні қаладағы «Қанағат» базары жанында Ақбай ауылдық округінен әкелінген бақша, сүт өнімдері сатылымға шығарылды. Он екі автокөлікке тиелген төрт тонна өнім кеш батқанша базар көркін қыздырды. Атап айтар болсақ, қаз, үйрек еттері мен қарбыз, қауын, асқабақ секілді бақша дақылдары қолжетімді бағада сатылды. Ал, шұбат, қымыз саумал өнімдері әп-сәтте төмен бағада өтіп кетті. Сонымен қатар, халық «СПК-Арал құс» цехының асыл тұқымды қаздарын 5000 теңгеге сатып алып жатты. Ортақ меншікпен негізделген жанұялық азық-түлік тауарлары да саудаға қойылды.
Света Үсенқұлова
