Аудан әкімі Құрбан айт мерекесімен құттықтады

Ардақты ағайын!

Құрметті жерлестер!

Барша мұсылмандар үшін қасиетті саналатын Құрбан айт мерекесімен шын жүректен құттықтаймын!

Асыл дініміз бен салт-дәстүріміздің сабақтастығын бекемдеп, рухани құндылығымыздың ажырамас бөлігіне айналған қастерлі мейрамның күллі мұсылман әлемінде алатын орны ерекше.

Құрбандық шалу – шүкіршіліктің бір көрінісі. Өйткені, осы күндері құрбандық шалып, ағайын-туысқа, мұқтаж жандарға қол ұшын беріп, қайырымдылық пен қамқорлық жасау баршамыздың басты парызымыз.

Алланың разылығы, ел-жұрттың амандығы үшін құрбан шалынып, қазан асылатын, мерекелік дастархан жайылып, ағайын-туысқа айттық беретін Құрбан айт мейрамы отбасыларыңызға ырысы мен берекесін ала келсін.

Қадірлі жамағат!

Еліміздің бірлігін бекемдеп, халқымыздың ынтымағын арттыратын мейрамда тілеген дұға-тілектеріңіз бен шалған құрбандықтарыңыз қабыл болсын.

Әрбір отбасына амандық, мықты денсаулық, мол ырыс пен бақ-береке тілеймін!

Құрбан айт құтты болсын!

Ізгі тілекпен Арал ауданының әкімі Серік Сермағамбетов