Арал ауданында мемлекеттік бағдарламалар аясында ауқымды жұмыстар жүруде

Таяуда аудан әкімі Серік Сермағамбетов мемлекеттік бағдарламалар аясында жүргізіліп жатқан бірнеше құрылыс нысандарының басында болып, атқарылып жатқан жұмыстардың бүгінгі жай-күйін бағамдады. «Моно және шағын қалаларды дамыту» бағдарламасы аясында жүргізіліп жатқан теміржол арқылы өтетін автожол көпірінің тіреуіш бағаналары қағылып, қажетті құрылыс материалдарын жеткізу жұмыстары жүргізілуде. Аудан әкімі құрылыс жүргізіліп жатқан нысанның мердігерлерімен жолықты. Сондай-ақ аудан басшысы сол маңайдағы тұрғындармен кездесіп, олардың түйткілді деген мәселелерін тыңдады. Халық үшін қолайлы жағдай жасау басты мақсат екендігін жеткізді.

«Көпір құрылысының сапалы жүргізілу – бәрімізге ортақ міндет. Құрылыс жұмыстары белгіленген кестеге сай жүруі тиіс. Оған ел азаматтары бір кісідей жұмыла, жанашырлықпен қарауымыз керек»- деді Серік Сағитжанұлы.

Мұнан соң аудан әкімі «Қуатты өңірлер - ел дамуының драйвері» ұлттық жобасы аясында сатып алынатын пәтерлерді көрді. Айта кетейік, биыл бағдарлама аясында Арал қаласынан 100 пәтерлік 50 үйдің құрылысы жүргізілуде. Оның 11-і Жақсылық Тілеубаев көшесінің бойынан тұрғызылуда. Аталған баспаналар әлеуметтік жағдайынан осал топтағы отбасыларға қараша айының соңында табысталады деп күтілуде.

Жайлы мектеп бағдарламасы бойынша алдағы екі жылда Арал ауданынан 4 мектеп құрылысын жүргізу жоспарланса, биыл алғашқысының құрылылысы басталды. "Арай" шағын ауданындағы 300 орындық заманауи білім ордасының құрылысын «Бақ-Береке» ЖШС-і жүргізбек. Қазіргі таңда құрылыс материалдарын жеткізу жұмыстары жүргізіліп, жер учаскесін тегістеу шаралары жүргзілуде.