Денсаулық нысандары көгілдір отынға қосылады

Таяуда аудан әкімі Серік Сермағамбетов жылу беру маусымына әлеуметтік нысандардың әзірлік жұмыстары барысымен танысты. Үстіміздегі жылы ауданда 3 денсаулық нысаны көгілдір отынға қосылатын болады. Ол үшін мемлекеттік сатып алу жұмыстары жүргізіліп, мердігер мекеме анықталған. Қазіргі таңда тиісті жұмыстар жүргізілуде. Жақсықылыш кентіндегі дәрігерлік амбулаторияның бу қазандығы ғимаратын жаңғырту мен газға қосу үшін 63,3 млн. теңге қаражат қаралған. Ал жүйке аурулар ауруханасының бу қазандығы ғимаратын жаңғырту мен газға қосу мақсатында 74,5 млн. теңге бөлінсе, «А. Байтұрсынов» ауылдық емханасы мен жұқпалы аурулар бөлімшесінің бу қазандығы ғимаратын жаңғырту мен газға қосу үшін 97,6 млн. теңге бөлінді. Бүгінде мердігерлер тарапынан қажетті құрал жабдықтар алынып, тиісті жұмыстарды бастауға әзірлік жүргізілуде.

Аудан басшысы Серік Сағитжанұлы биылғы жылыту маусымының жылдағыдан ерте басталу мүмкін екендігін ескеріп, құрылыс жұмыстарын уақытылы аяқтау қажеттігін тапсырды. Сондай-ақ бірінші кезекте сапаны бақылауды тиісті бөлімге жүктеді.