Сырдың сыйы Сарыарқаға жөнелді

Осы аптаның сенбі, жексенбі күндері Астана қаласының 25 жылдығына орай Қызылорда облысының тауар өндірушілерінің қатысуымен ауыл шаруашылығы тауар өндірушілерінің қатысуымен жәрмеңке ұйымдастырылуда. Сыр елі де бұл шарадан тыс қалмай, облыс орталығындағы Алтын қамбаның алаңынан Астана қаласына ауыл шаруашылығы өнімдері тиелген керуен жолға шықты. Осы керуен арқылы Арқа төріндегі жас қалаға 85 жылдық тарихы бар Қызылорда облысының брендіне айналған ақ күріші, балығы мен ас тұзы, қауын мен қарбызы, ұлттық сусындары жеткізілетін болады.

Жәрмеңкеде мұнан бөлек аймақта өндірілетін отандық өнімдерді қолдау мақсатында арнайы ауыл шаруашылығы өнімдерінің көрмесі ұйымдастырылады. Сондай-ақ қай кезден де "Сыр елі – жыр елі" атанған аймақтың өнерпаздары концерттік бағдарлама қойып, елорда халқын ерекше көңіл күйге бөлемек.

Жалпы жәрмеңкеде 60-қа жуық Сыр диқандары мен тауар өндірушілері 40 жүк көліктерімен жалпы құны 160 млн теңгені құрайтын 450 тоннадан астам өнімдер тұрғындарға ұсынылады.

Атап айтқанда, 130 тоннадан астам күріш, 10 тонна ет және 30 тоннаға жуық балық өнімдері, 30 тоннадай көкөніс пен жеміс-жидектер, 230 тонна бақша өнімдері, 3 тонна ас тұзы, 10 тоннадай сүт өнімдері, 5 тоннаға жуық сөк, талқан және кондитер өнімдері жөнелтілді.

Иә, мұның ішінде Арал ауданының брендтері де бар. Нақтырақ айтар болсақ, астаналықтар Аралдың ақ алтынына баланған тұз бен теңіз маржандарынан дәм тата алады. Себебі жәрмеңкеге 3 тонна тұз бен 10 тонна балық жөнелтілген.

"Толқын" ақпарат