Бірқатар мәселе депутаттар назарында
Өткен аптада Арал аудандық мәслихатының кезектен тыс 11 сессия отырысы өтті. Алдымен өткен тұрақты комиссия отырысына Арал ауданы әкімінің орынбасары, бөлім басшылары мен мәслихат депутаттары және ауылдық округ, кент әкімдері қатысты. Сессия барысында Арал қаласының және ауылдық округтер мен кенттердің 2023-2025 жылдарға арналған бюджетіне өзгерістер енгізу туралы және Сексеуіл кентіндегі Привокзальная көшесінің атауын өзгерту мен Арал аудандық мәслихаты аппаратының құрылымы мен шататтық кестесі, қызметтік автокөлігінің лимитін бекіту туралы мәселе қаралды. Жиында бірінші мәселе бойынша ауылдық округ әкімдері сөз сөйлеп, бюджет қаражаты туралы толықтай таныстыру жүргізді. Және кейбір үнемделген қаржыны ауылдың, кенттің дамуына тиісті салалар бойынша жұмсау бағытындағы ұсыныстарын білдірді.
Күн тәртібіндегі екінші мәселе бойынша аудандық «Мәдениет және Спорт» бөлімінің басшысы Б.Махатов баяндама жасап, өз пікірін комиссия талқысына ұсынды.
Арал аудандық мәслихатының төрағасы Б.Төрахметов мәслихат құрылымы мен штаттық кестесі, қызметтік автокөлік лимитін бекіту туралы өз баяндамасын жасады.
Көтерілген мәселелерге қатысты депутаттар өз сұрақтарын қойып, пікірлерін білдірді. Алдағы уақытта бағытталған жұмыстар атқарылып, тиісті шешімдер қабылданатын болады.
«Толқын» ақпарат
Фото: aqmeshit-zhastary.kz
