Ет өнімі еселенбек
Кейінгі жылдары ауыл шаруашылық бағытқа баса мән беріліп келе жатқаны жалпақ жұртқа кеңінен таныс. Жолдауда да жан-жақты айтылып келе жатқан осы мәселе. Өзге салаға қарағанда, қарбаласы көбейген бұл бағытта бірлі-жарым жұмыстар жасалып жатқаны да жасырын емес. Оған дәлелді арыға бармай-ақ, ауданымыздан да табуға болады. Аудандық деңгейде жұмыс жасайтын ауыл шаруашылығы бөлімінің бүгінде жұмысы жетерлік. Сансыз қоңырауларға жауап беру мен кезекте тұрған көптеген жанның көңіліне қонымды түсінік берудің өзі оңай шаруа емес. Мен де сол кезектердің бірінде болып, қойған сауалдарыма тұшымды жауап алғандардың бірімін. Әсіресе, ет өнімін экоспорттауда мүйізді ірі қара тұқымын асылдандыру бағытындағы бағдарламалар бар екендігі қуантты. «Құлан», «Алтын асық», «Сыбаға» сынды бағдарламалардың берер мүмкіншілігі зор екен. Жалпы, бұл жөнінде Елбасымыз ұсынған 5 институционалдық реформа аясындағы 100 нақты қадамда қамтылған. Айтар болсақ, индустрияландыру және экономикалық өсім атты үшінші бағыттың 61 қадамында: «Ет өндірісі мен өңдеуді дамыту үшін стратегиялық инвесторларды тарту. Негізгі міндет шикізат базасын дамыту және өңделген өнімдерді экспорттау»,-делінген. Демек, бұл саланың көші ілгерілеп, алдағы уақыттарда жоғары нәтиже берер. Мен де бұл бағытта мемлекет мүмкіндігін пайдаланып, жұмыс жасауға ниеттімін.
Б. Кабетова,
«Дүзбай Сейтпенбетов» шаруа қожалығының төрайымы,
Мергенсай ауылдық округі.
