Толқын Арал аудандық қоғамдық-саяси газет
» » Республикалық турнир жеңімпаздары анықталды

Республикалық турнир жеңімпаздары анықталды

Ел болашағы дені сау ұрпақтың қолында. Сол себепті, салауатты өмір салтын қалыптастыру, жастардың спортқа деген қызығушылығын арттыру және бұқаралық спортты дамыту бүгінде басты назарда тұрған мәселелердің бірі. Аудан көлемінде де спортты жанына серік етіп, Азия, Әлем біріншіліктерінде өз өнерін көрсетіп, жетістіктерге жетіп жүрген жастарымыз аз емес. Талай байрақты бәсекелерде жасындай жарқ еткен жерлесіміз Асқат Аханов солардың бірі еді. Сонау мектеп қабырғасында жүріп оқушы-спортшы атанған Асқат бүгінде арамызда жоқ болғанмен, жалынды спортшыны ізбасарлары еске алып тұрады.
Асқат Ахановты еске алуға арналған турнир үстіміздегі жылы 1 наурыз күні №64 орта мектепте бастау алған болатын. 2002-2003 жылдары туылған жасөспірім волейболшы қыздар арасындағы республикалық турнир 4 күнге созылып, жеңімпаз командалар анықталды. Еліміздің 5 облысынан қатысқан жалпы саны 16 команданың арасынан жерлестеріміз жүлделі орынға табан тіреді.
Арал ауданы әкімінің орынбасары Е.Әбішевтың қатысуымен өткен қорытындылау шарасында Арал ауданының командасына ІІІ орын табысталса, Оңтүстік Қазақстан облысы, Шымкент қаласының волейболшы қыздары ІІ орынды иеленді. Ал, Ақтөбе облысы, Хромтау ауданының командасы жарыс жеңімпаздары атанды.
Сонымен қатар, жарыс қорытындысы бойынша бірқатар қатысушы спортшылар мен жаттықтырушылар түрлі номинациялармен марапатталды.
О. ЖОЛДАСОВ.
05 наурыз 2018 ж. 502 0