Толқын Tolqyn.kz ақпараттық агенттігі
» » Билер кеңесі бітімге бастайды

Билер кеңесі бітімге бастайды

Би – дау-жанжалға билік айтушы адам. Би халықтың әдет-ғұрпын, салт-дәстүрін жақсы білумен бірге сөз таласында шешендігімен, даулы істі қарауда тапқырлығымен дараланып, ел ішінде беделді тұлға болу тиіс. Өнегелі қарияларымыз ер балаларға «Би бол, би болмасаң би түсетін үй бол» деп тегін бата бермеген ғой. Билер билік шығару және оның орындалу әдістерін белгілеуде тараптардың тең құқықтарын сақтап отыру керек.Елдігіміздің беріктігін нығайту мақсатында биліктің бір тармағы ретінде бүгінгі соттар кешегі өткен билердің ісін жалғастырып, ел ішінде туындаған дауларды шешуде, оны мән-мағынасы бойынша ғана қарап қоймай, екі тараптың бітімге қол жеткізу жолдарын медиация институты арқылы реттеуді ел арасында кеңінен насихаттауда. Ел болған соң дау-дамайсыз болмайтыны анық. Бірақ сол жанжалды ушықтырмай, дер кезінде шешуге қол жеткізу жолдарын дамыту бүгінгі күнде қай жиынның болса да басты тақырыбына айналып отыр. Өйткені ұлтымызға жат жағдайлардың белең алуы, салт-дәстүрдің ұмытылып, құндылықтардың құнсызданып, дүние игіліктері көбірек дәріптелетін қазіргі қоғамда адамдардың бір-біріне деген мейірімі мен сыйластығы азайып бара жатқаны жасырын емес.
Елбасымыз «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауында  жыл сайын 4 миллион азаматымыз сотта қаралатын іске қатысатынын, бұған қаншама күш пен қаражат жұмсалатынын, уақыт пен ресурстардың орынсыз шығынын талап ететін артық сот рәсімдері қысқаруға тиістігін атап өткен.
Міне, осы мәселеде елмен етене жұмыс жасайтын билер кеңесінің құрылып жатқанын көбі білетін болар. Тараптар мәселесін сотқа жеткізбей шешуді өздеріне міндет санайтын бұл жандардың басын қосатын билер кеңесінің кезекті жиыны аудандық сот ғимаратында өтті.
Оған аудандық соттың судьясы Г.Нұрымбетова, билер кеңесінің төрағасы Б.Бердалиев, хатшысы Ә.Үмбеталиев, мүшелері Ә.Садықбаев, А.Жолмағамбетов, Н.Оспанов, Ә.Әуезов, Ж.Жақып және аудан әкімшілігі заң бөлімінің маманы Н.Жиеналиев қатысты.
Билер кеңесінің жиынына аудандық соттың судьясы Г.Нұрымбетова төрағалық етіп, қазіргі қоғамдағы билердің атқаратын рөлін және оның маңыздылығына тоқталды. Мұнан соң аудандық билер кеңесінің төрағасы Б.Бердалиев қазақ қоғамында қалыптасқан дәстүрлі билер кеңесінің құрылғанын атап өтіп, кеңестің бекітілген ережесімен таныстырды. Сондай-ақ алдағы уақытта атқарылатын шараларды пысықтады.
Жиын барысында билер кеңесінің мүшелері билер кеңесінің төрағасына салаға қатысты өздерін толғандырған сұрақтарын қойып, өзара пікір алмасты. Жиында жалпы қазіргі қоғам билер сотына зәру екендігін, азаматтық дау-дамайларды ымырамен шешуде медиациялық тәртіппен жұмыс жасаудың тиімділігі кеңінен сөз болды. Осылайша істі сотқа жеткізбей, өзара бітімгершілік жолмен шешуде қазіргі уақытта жұмыс жасайтын билер кеңесінің маңыздылығы айтылды.
«Толқын» ақпарат
02 шілде 2019 ж. 925 0