Толқын Арал аудандық қоғамдық-саяси газет
» » Бітімгерлік – бірлікке бастайды

Бітімгерлік – бірлікке бастайды

Дау-жанжалды шешудің жаңа әдісі медиацияның енгізілгені баршаға аян. Бірнеше бағыттағы арыз-шағымдарды қарастыратын медиация әдісі бүгінде халық арасында кең көлемде насихатталып, ауқымы күн санап кеңейіп келеді. Қос тараптың шағымын бейтарап тарапта қарастырып, сотқа дейін шешуді мақсат тұтатын медиаторлардың да біліктілігі бүгінде басты назарда. Міне, медиаторлардың мәртебесін өсіріп, медиация саласының қоғамдағы орнын айшықтап беретіндей «Медиация күні» еліміздің барлық аймағында аталып өтуде. Ауданда да Қазақстан халқы Ассамблеясының ұйымдастыруымен «Медиация күні» республикалық акциясы аясында ашық есік күнін өткізді.
Оңталап ЖОЛДАСОВ
Ашық есік күніне орай татуласу орта­лы­ғын­да кәсіби және қоғамдық медиаторлар ақы­сыз негізде кеңестер беріп, медиациялық келісімдер жасады. Жергілікті уақытпен 10:00-де бас­тал­ған ашық есікке келген шағым­да­ну­шылар медиа­торлардың қабылдауында бо­лып, кеңестерін тың­дап, өзара бітімге келіп те жатты.
Өз сөзінде кәсіби медиатор А.Үмбетәлиев:
– Медиациялық орталықтар алғаш ашыл­ған­да­ғыдай емес, қазір қарқынды жұмыс істеп келеді. Медиаторларға деген халықтың сенімі артты. Дау-дамайды сотқа жеткізбей шешуді мақсат ететін бітімгерлердің кеңесі арқылы екі тараптың бәтуаға келуі тез әрі пайдалы бо­лып табылады. Біріншіден, уақытын үнемдесе, екін­ші­ден, қаржылай да қиындықтар туғызбайды. Сонымен қатар іс қаралу барысында да, одан кейін де жұмыс барысы жасырын жүргізіледі. Жарияланбайды. Әдетте бізге келушілер отбасы-неке дауы, әкімшілік, азаматтық және қылмыстық істер, меншік, жер, жылжымайтын мүлікке қа­тысты дау, банктер, микроқаржылық және кол­лек­торлық ұйымдармен дау, жұмыс беруші мен қызметкер арасындағы еңбек дауы, қызмет көрсету саласында сапаға қатысты дау және өзге де даулы мәселелермен жүгінеді. Барынша екі тарапқа да тиімді жағын қарастырып, бітімге келу жолын нұсқаймыз. Алдымызға арызданып келген жандардың қол алысып, екеуара жан­жал­дың ушықпауына жәрдем етеміз. Ауданда қазір 3 кәсіби медиа­тордан бөлек, 30 қоғамдық бітімгер және билер кеңесі қоғамдағы дау-жан­жалды шешудің жаңа деңгейін көрсетіп отыр. Жалпы, ертеден келе жатқан билердің жолын жаңғыртқан медиацияның бүгінгі тынысы ерек­ше, – дейді.
Сондай-ақ медиация күні қарсаңында жа­­қын­да ғана қызметіне тағайындалған ау­дан­дық сот төрағасы Кәмшат Сәдуақасова, ау­дандық сот Нұржан Бекетаев пен Серік Мұрат­байұлы тату­ласу орталығына арнайы ке­ліп, құт­тық­тауын жеткізді. Аудандық сот төрағасы К.Сәдуақасова өз сөзінде:
– Ел арасындағы түрлі келіспеушілік пен дау-жанжалды шешуде белсенді рөл атқарып жүр­ген және бітімге келудің ең жеңіл бағытын қос тараптың да пайдасына шешуді мақсат еткен медиаторларды бүгінгі медиация күні­мен құт­тықтаймын. Еңбектеріңіз еленіп, та­ту­лықты сақ­таудың жарқын жолында же­міс­ті жұмыс істеуге тілектеспін, – деп ыстық ықы­ласын жеткізді. Сон­дай-ақ билер кеңесі де мерекелік күнде өз­де­рінің тілектестігін жет­кізді.
06 тамыз 2019 ж. 162 0