Жігерлі жастар жетістікке жетті

Аудан әкімі М.Оразбаев «Бастауыш ұйым – партия тірегі» атты тақырыпта ұлттық спорт түрлерінен бастауыш партия ұйымдары арасында өткізілген турнир жеңімпаздарын арнайы қабылдады.«Nur Otan» партиясының 20 жылдығына орай облыстық деңгейде бастауыш ұйымдар арасында «Тоғызқұмалақ», «Қол күресі», «Асық ату», «Бес асық», «Арқан тарту» сынды спорт түрлерінен турнир ұйымдастырылған болатын. Облыстық деңгейдегі сайысқа аумақтық кезеңде жеңімпаз деп танылған 11 бастауыш ұйым қатысты.
Аталған турнирге қатысқан команда мүше­лерін «Nur Otan» партиясы Қызылорда облыстық филиалы төрағасының бірінші орынбасары А.Әлназарованың Алғыс хатымен, аудандық пар­тия филиалының төрағасы, аудан әкімі М.Оразбаев марапаттады.
Әрбір сайыс талас-тартысқа толы болды. Командалар өзара мықтыны анықтады. Жалпы командалық есепте мықты ойын көрсеткен Қазалы аудандық партия филиалының «Жан­қожа» бастауыш партия ұйымы жарыс жеңімпазы атанып, 150 мың теңге қаржылай сыйлыққа және партия кубогіне ие болды. Ал 100 мың теңге қаржылай сыйлықпен Арал аудандық партия филиалының «Сарбұлақ» бастауыш ұйымы екінші орынды иеленсе, Қызылорда қалалық партия филиалының «Шаңырақ» бастауыш партия ұйымы 50 мың теңге қаржылай сыйақымен үздік үштікті қанжығалады.
«Nur Otan” партиясының 20 жылдығына орай, Елбасы, партия Төрағасы Н.Ә.Назарбаевтың «Бо­лашақа бағдар: рухани жаңғыру» атты мақа­ласында көрсетілген міндеттерді жүзеге асыру аясында өткен жарыстың ІІ орын кубогі «Сар­бұлақ» бастауыш партия ұйымының төрағасы Ә.Әбілбаевқа табысталды.

«Толқын» ақпарат