"Шын күлкі ардан биік, шын бір өнер"

Таяуда аудандық мәдениет үйінде Қазақстанның халық әртісі, қоғам қайраткері Құдайберген Тәуекелұлы Сұлтанбаевтың 75 жылдығына орай «Шын күлкі ардан биік, шын бір өнер» атты республикалық әзіл-сықақ өнер ұжымдары байқауы өтті.

Бүгінгі күннің өзекті мәселелерін қағытпа қалжыңмен шебер жеткізіп, мәртебелі өнердің туын тік ұстап жүрген өнерпаздар алдымен ұжымдарын таныстырды. Атап өтер болсақ, Маңғыстау облысы «Бостан», Батыс Қазақстан облысы «Жалпақтал», Жамбыл облысы «Меркі», сонымен бірге Ақтөбе облысы «Екі Езу», Қызылорда қаласы «Мереке думан» және де Жаңақорған «Жаңаша», Арал ауданы «Алдаспан», Қазалы ауданы «Қазалы қалжыңы», сондай-ақ Жалағаш ауданы «Әзілизация», Шиелі ауданы «Қытық», Жалағаш ауданы «Жаңаша», Жаңақорған ауданы «Күлеміз бе, қайтеміз?» ұжымдары, барлығы 12 өнерлі ұжым бақ сынасқан болатын.
Мерекелік кеште аудан әкімі Серік Сермағамбетов:
– Қадірлі жерлестер, құрметті өнер сүйер қауым! Қазақ қашанда өнердің бәсін биік, беделін басқалардан жоғары қойған халық. Әсіресе Сыр жұртшылығы қазақ өнерінің қандай деңгейде екенін жете түсінеді. Өнер мен дәулет қонған құтты мекен Аралдың қай қиыры болмасын өнер ордасы. Биыл осынау өнер әлемінде орны айрықша Қазақстанның халық әртісі Құдайберген Сұлтанбаевтың 75 жылдығына орай халықтық өнер ұжымдарының қатысуымен республикалық байқау шымылдық түргелі тұр. Мен осы тұста өнерді салмақтай білген, бойындағы талантын тұншықтырмай жарыққа шығарған өнер ұжымдарының барлық мүшелеріне тек сәттілік тілеймін. Сіздер осындай бәсеке арқылы аудан мәдениетін басқаларға таныта түсесіздер. Сондықтан талаптарыңыз оңынан болып, тек дәстүрлі өнердің туын жоғары ұстай берулеріңізге тілектеспін, –деп жылы лебізін білдірді.

Шара аясында жерлесіміз ҚР «Мәдениет қайраткері», ақын, режиссер-сценарист Оңталап Дүйсенәліұлы «Арал ауданының құрметті азаматы» атағымен марапатталды. Қалың көпшілікті шараның қазылар алқасы таныстырылды. Сондай-ақ өнер ұжымдары танымал және жергілікті сықақшылардың бұрын-соңды орындалмаған шығармаларынан немесе өз қалауында қазіргі таңдағы өзекті проблемалар туралы скечтер, интермедияларды орындады.Мерекелік кештің қадірлі қонағы, Құдайберген ағамыздың балалық шақтан бірге өскен досы, елдің сыйлы ағасы Бауыржан Жылқыайдаров өзінің естелік лебізін білдірді. Кейін сахна төрінде қазылар алқасының төрағасы – ҚР «Мәдениет қайраткері» Оңталап Нұрмаханов сөз сөйледі. Келесі сөз кезегі «Қазақстанның еңбек сіңірген қайраткері» Асылбек Боранбаевқа берілді. Тағдыры теңізбен біте қайнасқан тума талант, белгілі күйші-композитор Мұрат Сыдықов сөз сөйлеп, мерекелік кешке алғысын білдірді.
Байқау қорытындысы бойынша "жүзден жүйрік, мыңнан тұлпар" атанып, өнерімен тамсандырған Батыс Қазақстан облысы «Үздік» деп танылды. Ал І орынды Ақтөбе облысы иеленсе, ІІ орынды Арал ауданы қанжығасына байлады. Сонымен бірге ІІІ орынды Жаңақорған ауданы мен Қызылорда қаласы иеленді. Қатысушы өнер ұжымдарға арнайы Алғыс хаттар мен сыйлықтар табысталды.