Өнердің қос өкілі, өмірде бірге жүрді...

Өнер айдынында қос аққудай қатар жүзген Муат Есқалиұлы мен Райса Бейбітқызы өмірде де, өнерде де жұптары жарасып, ел-жұртқа шынайы сезімдерімен, ақ адал ниеттерімен және өрелі өнерлерімен танылған. Өнерлі отбасының ән әлемінде бағындырған белестері аз емес. Муат мырзаның ерекше қоңыр дауысы, Райса ханымның қазақ қызына тән биязылығы көрген жанды тәнтi етпей қоймасы анық.Қос өнерпаз Аманөткел ауылдық мәдениет үйінде жұмыс жасаумен қатар Арал аудандық Өнер мектебі жанынан ашылған Аманөткел филиалында қызмет атқарады. Муат домбыра класынан сабақ берсе, Райса оқушыларға қазақ музыка мәдениетін дәріптеп, дәріс береді. Осылайша өмірін өнерімен өрнектеген қос әнші ауданның мәдениет саласының дамуына сүбелі үлес қосуда.
Өткен аптада өнерлі отбасының отағасы Муат Есқалиұлы елеулі елу жасқа толып, жарымен бірге «Өмірде де, өнерде де біргеміз» – атты шығармашылық концертін берді. Айтулы кеште облыс, республика көлемінде танылған өнер майталмандары келіп, өз жылы лебіздерін білдірсе, аудан әкімінің орынбасары Кете-Төлеби Бержанов пен аудандық білім бөлімінің басшысы Санира Жанназарова өнердің қос саңлағына шығармашылық табыс тілеп, құттықтау хат пен сый-сиапаттарын табыстады.
Кеш соңы сыр-сұхбатқа ұласып, қос өнер иесі өмір және өнер жолдары туралы жиылған жұртқа кеңінен әңгімелеп берді.
Ердос Есқали,
Қорқыт ата атындағы Қызылорда университетінің 1 курс студенті