Ұрпақты ұлттық рухпен сусындатқан
Алғашқы әскери және технологиялық дайындық пәні білім алушыларды отаншылдық рухпен Отан қорғауға дайын болуына тәрбиелеуге баса назар аударады. Әскери патриоттық рухты жастарды тәрбиелеу үшін жан-жақты жұмыс жасайды. Алғашқы әскери және технологиялық дайындық пәні арқылы оқушылар мектеп қабырғасында жүріп қаруды таниды, саптық даярлықты меңгереді, өмірлік қауіпсіздік ережелерін жаттайды, әскери жарғының не екенін түсініп, әскери шеберлікті үйренеді.Әр адамның өзіннің сүйікті ісі болады, міне, осы сүйікті мамандығын алға шығарып жүрген Талғат Мырзағұлов еңбек жолын 2013 жылы Қызылжар ауылындағы №81 орта мектебінде алғашқы әскери және технологиялық дайындық пәні мұғалімі болып бастаған. Сол жылдар аралығында түрлі іс-шараларға, әскери спорттық сайыстарға қатысып, өте жақсы жетістіктерге жеткен. Қазіргі таңда қаладағы №2 облыстық дарынды балаларға арналған мектеп-интернатында жұмыс істеп келеді. Алғашқы әскери және технологиялық дайындық пәні мұғалімі болып жұмыс жасай жүріп, балаларға білім мен тәрбие берудегі жолын болашақтың жаңа кірпішін қалаумен тең деп санайды. Себебі бүгінгі өсіп келе жатқан өскелең ұрпаққа дұрыс тәрбие мен білім беру – ұстаздардың басты парызы. Оқу жолында аянбай еңбек етіп, оқушыларды шыңдай білу де ұстаздың шеберлігі. Биылғы оқу жылы Талғат үшін жетістіктерге толы болып, өте жақсы нәтежелерге қол жеткізді. Көптеген аудандық, облыстық, республикалық сайыстарға қатысып, жүлделі орындар иеленді. Оқушылары да қалыс қалмады, аудандық, облыстық, республикалық дәрежеде өз өнерлерін көрсетіп, I, II, III орындар еншіледі.Ұстаздың нағыз маман екендігін шәкірттің жеткен жеңісі көрсетеді. Ұстаздық – ұлық емес, ұлы қызмет. Шәкірттің мықты болғаны – ұстаздың мықтылығы деп атап айтқым келеді. Ұстазы мықты, алғыр оқушылардан алдағы уақытта үлкен азамат пен азаматша шығатынына сенімім мол. Қазіргі таңда мектеп қабырғасында өсіп келе жатқан ұл мен қыздың бойына патриоттық сананы қалыптастыру аса қажет. Ата-бабаларымыз ұлан-байтақ даласын найзаның ұшымен, білектің күшімен қорғаған. Осындай кең-байтақ елімізді қорғау жолында отансүйгіштік қасиетін оқушы бойына қалыптастыру – әр адамның парызы, тікелей міндеті. Кейіпкеріміз Талғат та осы жолда аянбай еңбек етіп, жас буын санасына патриоттық сезім ұялатуда қалтқысыз қызмет етуде.
Әлнұр ЖАРҚЫНБАЕВ
