ӘН БАЙҚАУЛАРЫНЫҢ ЖЕҢІМПАЗЫ

Қызылжар елді мекеніндегі Мәдениет үйінде қызмет істейтін Ерлан Едігеев облыс көлеміндегі көптеген ән байқауларының жеңімпазы болып, жүлделі орындармен оралып жүр. Өнер бәйгелерінде суырылып шапқан жүйріктей  алға шығып жүрген жас жігіт ауылдастарының сүйіспеншілігіне бөленгендей.«Алтынды шыққан жерінен қаз» дегендей есімдері республика танымал болған талай әншілердің алғашқы тұсауын кескен қызылжарлық тыңдармандар Ерланның өнеріне оқушылық кезден-ақ қанық болатын. Құс қанаты қатайса биікке самғайтынын білсек, Ерлан да Мұхтар Омаров сияқты талантты өнерпаз басқаратын  киелі шаңырақтың киелі сахнасында өсіп, шыңдалып келеді. Біле білсек өнердегі алғашқы ұстазыда осы Мұхтар ағайы. Өйткені ол мектеп табалдырығын алғаш аттаған сәттен- ақ өзіне еліктіріп, ән әлеміне баураған. «Ағайдай болсам» деген арман талай рет қағаздан саз сырнай жасап, үй- ішінде өзін көпшілік алдында тұрғандай сезіндіріп, ән қиялына жетелейтін. Соның арқасында болар жақында өткен «Адал адам» мәдени- тәрбие орталығының жобасына сай өткізілген қоғам қайраткері, саясаткер Мұстафа Шоқайдың 134 жылдығына арналған «еңбегіңді ұмытпас ұлы далам»  атты облыстық патриоттық ән байқауына қатысып қайтты. Үлкен жауапкершілікпен қараған дайындық өз жемісін беріп, осы байқаудың бас жүлдесін қанжығасына байлап оралды.
Өнерпаз жігітке биылғы жыл көптеген табыстар әкелгендей. Оның алдында ғана Қызылорда облысының 85 жылдығы және Арал ауданының 95 жылдығы аясында Арал ауданы мәдениет үйінің қолдауымен  «Шөмішкөл» ауылдық клубы ұйымдастырған «Ән салса сазды сырнайым» атты баян аспабымен ән орындаушылардың аудандық байқауында да бас жүлдені иемденген болатын.
Өнердегі табысты жеңісі Арал аудандық әкімінің қолынан «Алғыс хат» алуға жеткізді.
Әншілік өнерімен қатар саз аспаптарында жетік меңгеруі Ерланды биік белестерге жеткізіп жүр. Өнер дегеніміздің өзі уақытпен санаспай көп ізденуді қажет ететін нәзік мамандық. Жүректен шыққан әуенді сан жүректерге жеткізе білу кез- келген әншінің қолынан келе бермейді. Тыңдаушысы жоқ ән жетім. Сондықтанда әнді Абай атамыз айтпақшы «құлақтан кіріп, бойды алардай...» қылып тыңдармандарға жеткізу үлкен дайындықты керек етеді. Осы қағидаларды жанында ұстаған Ерлан Роза Бағланованың  100 жылдығына арналған «Іңкәрім- ай» атты облыстық ретро ән орындаушылардың байқауында да жеңімпаз атанған.
Ерлан өзінің арысы кешегі дүниеден өткен Берекет жырау, күміс көмей әнші Темірхан Ерғалиев, берісі республика жұртшылығына танымал шайыр Шынберген мен Гүлнұр Оразымбетованың ауылында туғанын әркез мақтаныш тұтады.
Бізде Қызылжар ауылдық Мәдениет үйінің қызметкері Ерлан Едігеевтің өнер жолындағы табысты қадамдарына сәттілік тіледік.

Жақсыбай МУСАЕВ,
Қызылжар елді мекені