Жанарыма жан бітірген Жантемір
Адам баласының кіндік қаны тамған туған жері – қасиетті де киелі туған Жер-ана. Адам одан қуат алады, нәрленеді. Оның топырағы да, суы да шипалы. Міне, Аралдың киелі топырағынан жаралып, еліміздің түкпір-түкпірінде абыройлы еңбек етіп, туған жердің даңқын шығарып жүрген азаматтарымызды жіпке тізсек, жетіп-артылады. Қай кезде де елге еңбегі сіңген, жағымды мінезімен жаққан адамдардың есімі халықтың жүрегінде ұзақ сақталады. Өнегелі өмірі көпке үлгі боларлық. "Барлық өнердің ішіндегі ең ізгісі – медицина" деген Гипократтың қасиетті сөзін өзіне бағдаршамдай қабылдаған. Облыстық медицина орталығының бірінші санатты дәрігер-офтальмологы, жанарыма жан бітірген Изнатов Жантемір Мырзабекұлы туралы айтпақпын. "Екі аяғым пырағым, екі көзім шырағың" демекші, жас ұлғайған сайын екі аяқ та шаршаған ба, оның ішінде көздің көруі де нашарлаған сайын жүріп-тұру да қиындық тудыратыны анық. Көзімнің қан қысымы жоғары болып, қаладағы орталық емхана көз дәрігері Айнұр Дәрібаева мен медбике Нұрсұлу Медеубаева бір ай бойы емдеді. Тіпті өз қалталарынан қосымша көзге тамызатын дәрісін беріп, ота жасауға болатындай дәрежеге жеткізген, порталға қойып, қызмет жасаған ақ халатты абзал жандар Айнұр мен Нұрсұлу қыздарыма аталық тілегіммен ризашылығымды білдіремін. Сонымен мамыр айының ортасында порталда көрсетілген мезгілінде облыстық медицина орталығының офтальмология бөліміне ем-дом алуға қабылдандым. Ертеңіне дәрігердің қабылдауында болдым. Сырттай болса да осы бөлімде аралдық Жантемір есімді дәрігер қызмет етеді дегенді естуші едім. Дәрігердің жылы амандасуы, хал-жағдайды сұрауы емге шипа бергендей. "Аға, таңертеңгі тамаққа бармаңыз, аш қарында көзіңізге ота жасаймын" деді. Шығып бара жатып, дәрігерді көрсетіп, "Жантемір ме?" деп сұраған едім, "иә" деп жауап берді медбике.
–"Қарағым-ау, Аралдың топырағының исі шығып тұр ғой" дегенімде, қайта қолымнан алып амандасты. Жерлесің бе, туысың ба дәрігер үшін науқас адамдардың бәріне бірдей қызмет ететіні айқын нәрсе.
Жантемірдің әкесі Мырзабек ветеринария саласының білгірі болатын. Ол анасы Мария ұстаздардың ұстазы атанған әріптесім ретінде жақсы білемін.
Сонымен ота жасайтын бөлмеге де жеттік. Жантемір балам, жақсы боласыз дегендей ишарат білдірді. Ота жасалып болған соң көзге күтім жасау шараларын түсіндіріп жатты.
Атақты ғұлама Ибн Сина: "Дәрігер үш нәрсемен қарулануы қажет: біріншісі – жылы сөзі, екіншісі – қырағы көзі, үшіншісі – қолы жұмсақ болуы керек" деген ғұламаның қасиетті сөздері Жантемір Мырзабекұлына қаратып айтылғандай әсер қалдырды. Гүлмира Жаппарқызы бастаған медбикелердің қызметіне дән риза болдық. Жүрекке жылы тиетін сөздерімен, барлық емдерді уақытылы жасап жүрген жайсаң жандар. Ал тазалық бірінші кезекте, асханадағы тамақтың құнарлығы, сапасымен қатар аспазшылардың шынайы ықыласы емімізге дауа бергендей. Сол үшін де бөлімнің барлық адал, мінсіз қызметкерлеріне ризашылық білдіреміз.
Ертеде бір данагөйден: "Дүниеде кім бақытты? деп сұраса, ол дүниеде көп адамды бақытты еткен адам бақытты" деп жауап беріпті. Сол данагөй айтқандай, облыстық түкпір-түкпірінен келіп жатқан қаншама адамдардың жанарына жан бітіріп, қуанышқа бөлеп, бақытты еткен Жантемір баламыз нағыз бақытты азамат деуге әбден лайық.
Белгілі данагөй А.В. Вишневский: "Тағдыр бізге скальпельді әдемі және тез жұмыс істеу үшін емес, адамдарды бақытсыздықтан (бәледен) құтқару үшін берді" деген екен. Сол айтқандай, скальпельдердің адамдарды бақытты етуі үшін түзі өзіне зор денсаулық тілеп, халықтың көз жанарына жан бітіре бер деген аталық тілегімді жеткізгім келеді.
А. ЖОЛМАҒАМБЕТОВ
Фото: автордан
