Толқын Tolqyn.kz ақпараттық агенттігі
» » » Қызылша ауруының алдын алу жолдары қандай?

Қызылша ауруының алдын алу жолдары қандай?

Бүкілдүниежүзілік денсаулық сақтау ұйымының дерегі бойынша қазіргі таңда әлемнің 167 мемлекетінде 569 мың адам қызылша ауруымен тіркелген. Бұл ауру біздің елімізді де айналып өткен жоқ. Республика, облыс, аудан көлемінде қызылша ауруынан эпидемиологиялық жағдай күрделеніп отыр.
Бүгінгі біздің сұхбатымыз Арал аудандық санитариялық-эпидемиологиялық бақылау басқармасының басшысы Ақзия Қасымқызы Сатекеевамен Арал ауданында қызылша ауруының тіркелу деңгейі, оның алдын алу шаралары туралы болмақ.
– Ауданымызда қазіргі кезде қызылша ауруының тіркелу деңгейі қалай?
– Арал ауданында 2023 жылдың тамыз айынан бастап жылдың аяғына дейін қызылша ауруының алғашқы диагнозымен 407 ауру тіркелді, оның ішінде 14 жасқа дейінгі балалар -310, яғни жалпы ауырғандардың 76,2 пайызын құрап отыр.2024 жылдың қаңтар айынан бастап қызылша ауруының алғашқы диагнозымен 94 ауру тіркелді, оның ішінде 14 жасқа дейінгі балалар -80, яғни жалпы ауырғандардың 85,1 пайызын құрап отыр.
Ауырғандар негізінен 5 жасқа дейінгі балалар, олардың үлесі ауырғандар арасында 72,2 пайыз құрады.Осы ауырғандар арасында қызылшаға қарсы егілмеген адамдар 75,1 пайыз құраса, ата-анасының қарсылығына байланысты егілмеген балалар 25,2 пайызын құрап отыр. Балаларын қызылшаға қарсы ектірмеген ата-аналар балаларының денсаулығын қатерге тігіп отырғанын ойласа екен деген өтінішіміз бар.
– Қазір тіркеліп жатқан қызылша ауруының клиникасының ерекшелігі неде?
– Қызылша ауруының вирусы өзінің аса жұқпалылығымен ерекшеленуде, вирус өте қауіпті және клиникалық белгілері өте ауыр өтуде.
Қазіргі қызылшамен ауырған жасқа толмаған және 5 жасқа дейінгі балаларда ауру ауыр клиникалық белгілерімен ерекшеленуде, дене қызуының жоғары температураларға дейін көтерілуі, соның салдарынан балаларда тырысу белгілерінің пайда болуы, өкпеде қабыну белгілерінің жиілеуі , жалпы иммуниттетті әлсіретуі, соның салдарынан басқа да созылмалы ауруларды қоздыру қаупі ұлғаюда.
Айтыңызшы , қызылша ауруынан қорғанудың қандай тиімді тәсілдері бар?
– Әрине,қызылша ауруынан қорғанудың тиімді жолы - 1 жасында және 6 жасында қызылшаға қарсы жоспарлы егу шараларын жасату. Сонымен қатар 30 жасқа дейінгі қызылшаға қарсы егілмеген, егілгені жөнінде дерегі жоқ адамдар да қызылшаға қарсы егілуге тиіс.
– Қызылша ауруынан балаларды қорғау мақсатында қосымша екпелер қаралды ма?
Жасқа толмаған және 5 жасқа дейінгі балалар арасында ауру деңгейін азайту, балаларды қызылша ауруынан қорғау мақсатында Қазақстан Республикасы Денсаулық сақтау министрлігінің Бас мемлекеттік санитариялық дәрігерінің 01 қараша 2023 ж. №7 қаулысына сәйкес республика бойынша 6 ай мен 10 ай 29 күн аралығындағы балаларға 2023 жылдың қараша мен 2024 жылдың сәуір айларының аралығында және бұрын қызылшаға қарсы егілгеніне қарамастан 2 - 5 жас аралығындағы балаларға 2023 жылдың 27 қарашасынан бастап қызылшаға қарсы егу шаралары жүргізілуде.
Арал ауданында қызылшаға қарсы егу шарасына 6 ай мен 10 ай 29 күн аралығындағы 1125 бала жоспарланып, бүгінгі таңға 1107 бала егіліп, қамту пайызы 98,4 пайызды құраса, 2-5 жас аралығындағы 5250 бала жоспарланып, 5218 бала егілді, яғни 99,4 пайыз қамтылды. Егу шаралары неғұрлым ерте аяқталса, егу шарасынан соң 21-28 күнде балалардың ағзасында қызылша ауруына қарсы тұру қабілеті қалыптасып, бұл балалар қызылша ауруынан қорғалады.
Егу шарасына Дүниежүзілік денсаулық сақтау ұйымының сертификатын алған вакцина қолданылады. Ауруды еңсерудің нақты жолы - балаларды қызылшаға қарсы егіп, 6 айлық сәбилерден бастап 5 жасқа дейінгі балаларды қызылша ауруынан қорғау.Балаларыңызды қызылшаға қарсы ектіріңіздер!

Сұхбатыңызға рақмет!
Әңгімелескен,: Гүлмарал САҚТАПОВА 

Сурет: ашық дереккөз 
24 қаңтар 2024 ж. 2 844 0