Толқын Арал аудандық қоғамдық-саяси газет
» » Қазақстанда күнбағыс майы қымбаттады

Қазақстанда күнбағыс майы қымбаттады

Қазақстан күнбағыс майын экспорттаушы ел болғанына қарамастан, оның бағасы бір жылда 20%-ға қымбаттаған, деп хабарлайды Egemen.kz.

Еnergyprom.kz деректеріне сәйкес, 2022 жылдың қаңтар-мамыр аралығында 197,3 мың тонна күнбағыс майы өндірілген. Бұл өткен жылға қарағанда 29,6%-ға көп. Ал тазартылмаған күнбағыс майының өндірісі бір жыл бұрынғы көрсеткіштен 61,3%-ға артық болса, тазартылған өнімнің өндірісі былтырғыдан 6,9%-ға аз.

«Тазартылмай сатылатын күнбағыс майының 78%-ын Шығыс Қазақстан өңірі беріп тұр. Ал тазартылған күнбағыс майының 78%-ын Шығыс Қазақстан облысы (28,7 мың тонна) мен Шымкент қаласы (22,6 мың тонна) берген. Ауыл шаруашылығы министрлігі Қазақстан аумағынан күнбағыс майын алып шығуға 31 тамызға дейін шектеу қойды. Сол арқылы сектордағы бағаны тұрақтандырып, тапшылықтың алдын алмақшы. Маусым-шілде айларында күнбағыс майын шығару квотасы 68 мың тонна болып бекітілді», деп жазады Еnergyprom.kz сарапшылары.

Отандық өндірушілер 2022 жылдың ақпан-сәуір айларында күнбағысқа деген сұранысты 83,5%-ға орындаған. Өндіріс көлемі былтырғыдан 16,9% артық. Өндірілген 149,1 мың тонна майдың 66,3 мың тоннасы сыртқа сатылған. Бұл былтырғыдан 71,3% көп. Ал ішкі нарықта күнбағыс майының сатылымы 0,6%-ға ғана артқан.
24 маусым 2022 ж. 1 299 0