Толқын Арал аудандық қоғамдық-саяси газет
» » ТАЗАЛЫҚТЫ САҚТАУ - КӨПТІҢ ІСІ

ТАЗАЛЫҚТЫ САҚТАУ - КӨПТІҢ ІСІ

Қазақ тілінде «тазалық» деген сөз бар. Қазақ тілінің түсіндірме сөздігінде ол екі түрлі мағына береді. Бірінші мағынасы – кір, лас болмай, яғни адамның өз денесін таза ұстап, киетін киімін таза кие білу. Бұл –мәдениеттіліктің белгісі. Бірақ қазір сол мәдениетті қоғамдық орындарда сақтай алмай келеміз. Әдемі, таза киінгенмен қоғамдық жерлерде тазалықты сақтамау-мәдениетсіздіктің белгісі. Сондықтан да біздер өз денемізге, киімдерімізге келгенде мәдениетті бола қаламыз да, ал қоғамдық жерлерде мәдениетсіздігімізді көрсетіп аламыз. Қоқыстарды жинайтын адамдар бар ғой деп кез келген жерге қоқыстарды лақтырамыз. Қаламызды қоқыстарды тазартатын «Тазалық» мекемесінің жұмысшылары үнемі сыпырып, тазалап жүреді. Бірақ солай екен деп олардың бұл еңбегін құрметтемеу жөн болмайды. Бұл мәдениетсіздік әрі қарай жалғаса бермеуі керек. «Тазалықты сақтай білу» тек «Тазалық» мекемесі жұмысшыларының ғана міндеті емес. Осы қалада тұратын барша тұрғындардың міндетіне айналуы керек. Өз тазалығы мен үй, аула, қоғамдық орындар тазалығын сақтай білу қала тұрғындарының өмірге деген қарым — қатынасының қандай деңгейде екенін көрсетеді.
Қазақтың көрнекті ақыны А.Байтұрсынов: «Теп – тегіс көпке ұнап оңай емес, Кейіне жарамаса, кейіне жарар», - дегендей, жалпақ жұртшылыққа оймақтай ғана ой салғым келді. «Адамдардың ең жақсысы – басқа адамдарға пайдалы болғаны» демей ме? Ендеше, тама-тама теңіз құрайтын тамшыдай барлығымыз бірауыздан тазалық жұмыстарына атсалысайық!!!
Жақсылықова Ақгүл,
Арал қаласының тұрғыны.
07 қараша 2019 ж. 247 0